काठमाडौं । नेपाल–चीन सीमा क्षेत्रमा आएको विनाशकारी बाढीपहिरोपछि उत्पन्न मानवीय संकटमा नेपाललाई सहयोग गर्न अन्तर्राष्ट्रिय समुदायले वित्तीय सहायता, राहत सामग्री तथा खोज तथा उद्धार टोली परिचालन गर्न थालेको छ ।

युरोपेली आयोगकी अध्यक्ष उर्सुला भोन डेर लेयनले बाढीबाट अत्यधिक प्रभावित परिवार तथा समुदायका लागि २० लाख युरो बराबरको मानवीय सहायता घोषणा गरेकी छन् ।

त्यस्तै, भारत सरकारले १० टन राहत सामग्री बोकेको तेस्रो विमान नेपाल पठाएको छ । भारतले राहत सामग्रीसँगै उद्धार कार्यमा सहयोग गर्न ११ सदस्यीय चिकित्सक, पारामेडिक्स तथा विशेष प्राविधिक टोली समेत नेपाल पठाएको छ ।

क्यानडाले पनि विपद् प्रभावितका लागि ५० लाख क्यानेडियन डलर सहयोग गर्ने प्रतिबद्धता जनाएको छ । त्यस्तै, न्युजिल्यान्डले नेपाल रेडक्रस सोसाइटी तथा अन्य राहत संस्थामार्फत प्रभावित समुदायसम्म सहायता पुर्‍याउन २० लाख न्युजिल्यान्ड डलर सहयोग गर्ने घोषणा गरेको छ ।

यसैबीच, काठमाडौंस्थित अमेरिकी दूतावासले रसुवाका अस्थायी आश्रयस्थलमा रहेका बाढीपीडितका लागि २.५ टनभन्दा बढी खाद्य तथा आपत्कालीन राहत सामग्री उपलब्ध गराएको छ । उक्त सामग्री प्रभावित परिवारको तत्कालीन आवश्यकता सम्बोधन गर्न प्रयोग गरिने जनाइएको छ ।

अन्तर्राष्ट्रिय रेडक्रस तथा रेड क्रिसेन्ट आन्दोलनले पनि विपद्पछिको मानवीय आवश्यकतालाई सम्बोधन गर्न आफ्नो विश्वव्यापी सञ्जाल परिचालन गरेको छ । रेडक्रसले तत्काल जीवनरक्षा तथा मानवीय सहायता सञ्चालनका लागि २ करोड ५० लाख स्वीस फ्रयांक बराबरको अन्तर्राष्ट्रिय अपिल जारी गरेको छ ।

भोटेकोशी बाढीपहिरोले रसुवा, नुवाकोट, धादिङलगायतका जिल्लामा ठूलो जनधनको क्षति पुर्‍याएपछि प्रभावित क्षेत्रमा खोज तथा उद्धार, घाइतेको उपचार, अस्थायी आश्रय, खाद्यान्न र अत्यावश्यक सामग्रीको आवश्यकता बढेको छ ।

नेपाल सरकारले सुरक्षा निकाय तथा राष्ट्रिय विपद् व्यवस्थापन संयन्त्रमार्फत उद्धार र राहतलाई तीव्रता दिइरहेका बेला अन्तर्राष्ट्रिय वित्तीय सहयोग, राहत सामग्री र विशेषज्ञ उद्धार टोलीको परिचालनले प्रभावित क्षेत्रमा मानवीय सहायता विस्तार गर्न थप आधार तयार गरेको छ ।

Originally published on abcnews.com.np.