काठमाडौं । रसुवाको भोटेकोशीमा बुधबार आएको विनाशकारी बाढीका कारण अवरुद्ध बनेको पृथ्वी राजमार्गअन्तर्गत धादिङको बैरेनीदेखि गलौदीसम्मको सडकखण्ड एकतर्फी रूपमा सञ्चालनमा आएको छ ।

बाढीले सडकका विभिन्न स्थानमा ठूलो मात्रामा लेदो थुपारेपछि अवरुद्ध बनेको काठमाडौं–मुग्लिन सडकखण्डमा लेदो तथा अवरोध हटाएपछि शुक्रबार राति ८ बजेदेखि एकतर्फी रूपमा सवारी सञ्चालनमा ल्याइएको सुरक्षा तथा ट्राफिक व्यवस्थापन कार्यालय, रामनगरका प्रमुख डिल्ली नारायण पाण्डेले जानकारी दिए ।

उनका अनुसार बाढीका कारण राजमार्गका विभिन्न स्थानमा अलपत्र परेका सवारीसाधनलाई प्राथमिकतामा राखेर गन्तव्यतर्फ पठाइएको छ । सडकमा सवारीसाधनको चाप रहेकाले समस्या भएका स्थानमा सुरक्षाकर्मी परिचालन गरी यातायात व्यवस्थापन तथा सहजीकरण भइरहेको छ ।

बैरेनीमा अझै समस्या

पृथ्वी राजमार्गको धादिङस्थित बैरेनी क्षेत्रमा भने लेदो पूर्ण रूपमा हटाउन बाँकी रहेकाले हाल एकतर्फी मात्रै सवारी सञ्चालन भइरहेको छ ।

पाण्डेका अनुसार बैरेनी क्षेत्रमा थुप्रिएको लेदो दुई–चार घण्टामै हटाउन सकिने भए पनि सडकमा सवारीसाधन सञ्चालन भइरहँदा सफाइ तथा व्यवस्थापनको काममा कठिनाइ भइरहेको छ ।

‘शुक्रबार राति ८ बजेतिर सडक वान वे सञ्चालनमा ल्याएका हौँ । बाढीका कारण राजमार्गका ठाउँठाउँमा अलपत्र अवस्थामा रहेका सवारीसाधनलाई प्राथमिकतामा राखेर गन्तव्यतर्फ पठाउने काम गरेका थियौँ,’ उनले भने ।

अब सडकलाई दुईतर्फी रूपमा सञ्चालनमा ल्याउने गरी लेदो तथा अन्य अवरोध हटाउने काम अघि बढाउने योजना रहेको पाण्डेले बताए ।

भोटेकोशी बाढीका कारण पृथ्वी राजमार्गको विभिन्न स्थानमा सडकमा लेदो थुप्रिँदा काठमाडौं र मुग्लिनबीचको यातायात प्रभावित भएको थियो । सडक क्रमशः सञ्चालनमा आए पनि जोखिमयुक्त स्थानमा सुरक्षाकर्मी परिचालन गरी यातायात व्यवस्थापन भइरहेको छ ।

Originally published on abcnews.com.np.