काठमाडौं । अष्ट्रेलियामा जारी टप एन्ड टी–२० सिरिज २०२६ मा नेपाल ‘ए’ पुरुष क्रिकेट टोलीले आज भिक्टोरिया एकेडेमी (सिए–११) विरुद्ध प्रतिस्पर्धा गर्दैछ । प्रतियोगिताको आफ्नो अन्तिम खेलमा नेपाल जित निकाल्दै सुखद अन्त्य गर्ने लक्ष्यमा छ ।

डार्विनस्थित डिक्सी एरिना/मारारा क्रिकेट मैदानमा हुने खेल नेपाली समयअनुसार दिउँसो १ बजे सुरु हुने तालिका छ । यो प्रतियोगिताको २७औँ खेल हो ।

नेपाल ‘ए’ यसअघि खेलेका पाँचमध्ये दुई खेलमा विजयी र तीन खेलमा पराजित भएको छ । टोलीले नर्दन टेरिटोरी स्ट्राइक र बंगलादेश हाइपरफर्मेन्स–११ विरुद्ध सुरुआती खेलमा पराजय बेहोरेको थियो । त्यसपछि होबार्ट हरिकेन्स एकेडेमी र अष्ट्रेलियन क्यापिटल टेरिटोरीविरुद्ध जित निकालेको थियो । पछिल्लो खेलमा भने हैदरावाद किङ्समेन एकेडेमीसँग ३१ रनले पराजित भएको थियो ।

उता भिक्टोरिया एकेडेमी प्रतियोगितामा बलियो टोलीका रूपमा देखिएको छ । टोलीले सुरुआती चरणमा राम्रो प्रदर्शन गर्दै सेमिफाइनल दौडमा आफूलाई बलियो अवस्थामा राखेको छ । भिक्टोरियाका विल सदरल्यान्ड र साम इलियटजस्ता खेलाडीले प्रतियोगितामा प्रभावशाली प्रदर्शन गरेका छन् । सदरल्यान्डले ब्याटिङमा उच्च स्ट्राइक रेटसहित रन बनाएका छन् भने इलियटले बलिङमा महत्वपूर्ण विकेट लिएका छन् ।

नेपालका लागि आजको खेल प्रतियोगिताको अंकतालिकामा ठूलो परिवर्तन ल्याउनेभन्दा पनि अष्ट्रेलियाली घरेलु तथा विकासशील टोलीसँगको प्रतिस्पर्धाबाट अनुभव बटुल्ने र जितसहित अभियान टुंग्याउने अवसरका रूपमा रहनेछ ।

नेपाल ‘ए’को टोलीमा कप्तान अनिल साहसँगै कुशल भुर्तेल, कुशल मल्ल, लोकेश बम, पवन सर्राफ, दीपक डुम्रे, आकाश चन्दलगायत खेलाडी छन् । भिक्टोरियाको नेतृत्व विल सदरल्यान्डले गर्नेछन् ।

टप एन्ड टी–२० सिरिजको यस संस्करणमा नेपालले लगातार दोस्रो सहभागिता जनाएको हो । प्रतियोगितामा नेपालले प्राप्त गरेको अनुभव आगामी अन्तर्राष्ट्रिय प्रतियोगिताका लागि खेलाडी विकास र तयारीका दृष्टिले महत्वपूर्ण हुने अपेक्षा गरिएको छ ।

आजको खेलपछि प्रतियोगिताका सेमिफाइनल खेल आइतबार र फाइनल पनि सोही दिन हुने तालिका छ ।

Originally published on abcnews.com.np.