काठमाडौं, २० मंसिर । इंग्लिस प्रिमियर लिग क्लब म्यानचेस्टर युनाइटेड समूह ‘ए’ को विजेताको रुपमा च्याम्पियन्स लिग फुटबलको अन्तिम १६ मा पुगेको छ ।

घरेलु मैदानमा गएराति भएको समूहको अन्तिम खेलमा जोसे मोरिन्होको टिम म्यानचेस्टर युनाइटेडले सिएसकेए मस्कोलाई २–१ ले हरायो । पहिलो हाफमा १–० ले पछि परेको युनाइटेडले दोस्रो हाफमा गोल गर्दै नतिजा आफ्नो पक्षमा पारेको हो । ४५ औं मिनेटमा विटिन्होको गोलबाट मस्कोलो सुरुवाति अग्रता लिएको थियो । तर ६४ औं मिनेटमा रामेलु लुकाकुले युनाइटेडका लागि बराबरी गोल गरे । त्यसको दुई मिनेटपछि मार्कस राशफोर्डले युनाइटेडका लागि विजयी गोल गरे । जितपछि ६ खेलबाट १५ अंक जोडेको युनाइटेड समूह विजेता बन्यो । यस्तै राति नै भएको खेलमा बेन्फिकालाई २–० ले हराएको एफसी बासेल समूह उपविजतोको रुपमा अन्तिम १६ मा पुगेको छ । उसको ६ खेलबाट १२ अंक भएको छ ।