काठमाडौं, ९ पुस । नेकपा प्रचण्ड–माधव समूहका अध्यक्षद्वय पुष्पकमल दाहाल प्रचण्ड र माधवकुमार नेपालसँगै वरिष्ठ नेता झलनाथ खनाल बल्खुस्थित पार्टी कार्यालयको निरीक्षणमा पुग्नु भएको छ । तत्कालीन एमालेको पुरानो पार्टी कार्यालय निरीक्षण गर्न दुवै अध्यक्षसहित अनुशासन आयोगका प्रमुख अमृत बोहोरा पनि सँगै जानुभएको छ । बिहीवार बबरमहलस्थित एक बैंकटमा आयोजना गरिएको केन्द्रीय कमिटी बैठकपछि दुवै अध्यक्ष तत्कालीन एमालेको पार्टी कार्यालय निरीक्षणमा पुग्नुभएको हो । तत्कालीन एमालेको पार्टी कार्यालय भूकम्पले क्षतिग्रस्त बनेको छ भने त्यहाँ अहिले भग्नावशेष मात्र छ । नेताहरुले यहाँ रहेको मदन भण्डारीको शालिकमा माल्यार्पण समेत गर्नुभएको छ । यो ठाउँसँग आफूहरुको सम्बन्ध गाँसिएको भन्दै पार्टीको भवन बनाउने बताउदै अध्यक्ष प्रचण्डले सबैलाई मिलाएर पार्टीलाई एकतावद्ध बनाउने धारणा ब्यक्त गर्नुभयो ।