काठमाडौं, १७ पुस । नेपाल कम्युनिष्ट पार्टी नेकपाको विभाजनमा अहिलेसम्म तटस्थ रहँदै आएका उपाध्यक्ष वामदेव गौतमले शुक्रबार नेकपाका अध्यक्ष पुष्पकमल दाहाल प्रचण्डसँग छलफल गर्नुभएको छ । खुमलटार स्रोतका अनुसार प्रचण्डलाई भेट्न वामदेव बिहान १० बजेतिर उनको निवास खुमलटार जानुभएको हो । राष्ट्रिय सभाको हिउँदे अधिवेशन सुरू हुने दिन राष्ट्रिय सभा सदस्यसमेत रहेका वामदेव प्रचण्डलाई भेट्न जानुभएको हो । राष्ट्रिय सभामा नेकपाकै प्रचण्ड नेपाल समूहका सदस्यहरूले प्रतिनिधि सभा विघटनविरूद्ध आवाज उठाउने बताईएको छ । नेकपाको तत्कालीन ९ सदस्यीय सचिवालयमध्ये महासचिव बिष्णु पौडेल, ईश्वर पोखरेल र रामबहादुर थापा प्रधानमन्त्री ओलीको समूहमा हुनुहुन्छ । रामबहादुर थापा केही दिनको अन्यौलपछि ओली समूहमा लाग्नु भएको थियो भने वामदेवले भने अहिलेसम्म आफ्नो कित्ता क्लियर गर्नुभएको छैन ।