काठमाडौं, १८ पुस । प्रधानमन्त्री केपी ओली ओलीले प्रचण्ड–माधव नेपाल खेमा पदको पछाडि दौडिरहेको बताउनुभएको छ । उहाले पद चाहिएको भए पार्टी बैठकमा आउन समेत अनुरोध गर्नुभयो । आफू पक्षीय काठमाडौं जिल्ला कमिटीद्वारा आयोजित कार्यकर्ता भेलालाई सम्बोधन गर्दै ओलीले प्रचण्ड–नेपाललाई खिया लागेको नटबल्टुको समेत संज्ञा दिनुभयो । ‘उहाँहरुलाई पद चाहिएको छ । पद चाहिएको भए पार्टी बैठकमा आउनुपर्ने हो’, प्रचण्ड–नेपाललाई व्यङ्ग्य गर्दै प्रधानमन्त्री ओलीले भन्नुभयो, ‘सुन्तला खान सुन्तला घारीमा जानुपर्छ, सल्लाघारी जाने होइन ?’ उहाले पार्टी एकता गरिएपनि काम गर्न नदिएको उल्लेख गर्दै प्रचण्ड–नेपाल आफ्नो बाटो लागेपछि पार्टी राम्ररी चलिरहेको दावी समेत गर्नुभयो। ‘तीन वर्षसम्म पार्टी हलचल हुन सकेन । तर अहिले दुई वटा नटबोल्ट खिया लागेर झरेपछि पार्टी यसरी चलेको छ,’ उहाले आफ्नो पक्षमा माहोल रहेको संकेत गर्नुभयो ।

पार्टीको विधि र संविधान अनुसार आफूहरुले पार्टी चलाइ रहेको पनि ओलीले दावी गर्नुभयो । उहाँले प्रचण्ड–नेपाल समूहले आन्दोलनको घोषणा गरेको आफूलाई जानकारी रहेको उल्लेख गर्दै तर त्यो आन्दोलनको औचित्य नभएको समेत बताउनुभयो । यस्तै आधिकारिक नेकपा आफूले नेतृत्व गरेको समूह नै रहेको जिकिर गर्दै उहाले ‘बसिरहेको घर मेरो भन्दै निवेदन हाल्ने ? ’ भन्दै इतर समूहलाई प्रश्न समेत गर्नुभयो । उहालेप्रचण्ड–नेपाल पक्षलाई आगामी निर्वाचनमा दुईटा अंकको सिट ल्याएर देखाउन पनि चुनौति दिनुभयो । उहाँले प्रचण्ड नेपाल समूहले बहुमत रहेको दावी गर्दै हिँडेको भन्दै त्यसको नतिजा आगामी वैशाख १७ र २७ गते देखिने पनि बताउनुभयो ।