काठमाडौं, २० पुस । प्रधानमन्त्री तथा मन्त्रिपरिषद् कार्यालयले नेपाल विद्युत् प्राधिकरणको भार सम्प्रेषण केन्द्रमा आकस्मिक अनुगमन गरेको छ । पछिल्लो पटक विद्युत आपुर्तिमा समस्या देखिएपछि प्रधानमन्त्री कार्यालयले आकस्मि अनुगमन गर्दै आपूर्ति सम्बन्धमा देखिएको सबैखाले समस्या तत्काल हटाउन कडा निर्देशन दिएको हो ।

काठमाडौं उपत्यकालगायत देशका प्रमुख सहरमा विगत केही दिनदेखि विद्युत् आपूर्तिमा समस्या सिर्जना भएको गुनासो आएपछि प्रधानमन्त्री केपी शर्मा ओलीको निर्देशनमा प्रधानमन्त्री तथा मन्त्रिपरिषद् कार्यालयका अधिकारीले शनिबार बेलुकी ६ बजेदेखि ८ बजेसम्मको पिक समयमा प्राधिकरणको स्थगलत अनुगमन गरेका हुन् । प्रधानमन्त्री कार्यालयको हेलो सरकार कक्षमा समेत बिजुलीमा देखिएको गडबडीबारे व्यापक गुनासो र उजुरी आएका थिए ।

प्रधानमन्त्रीका विकास सल्लाहकार गजेन्द्र थपलियाको नेतृत्वमा गएको अनुगमन टोलीले प्राधिकरणमा दुई घण्टासम्म बसेर समस्याबारे जानकारी लिएको थियो । प्रधानमन्त्रीका सल्लाहकार समूहले प्राधिकरणका प्रबन्ध निर्देशक हितेन्द्रदेव शाक्यसँग बिजुली अवरुद्ध हुनाका कारण र समस्याबारे जानकारी लिँदै तत्काल सबै प्रकारका समस्या समाधान गरेर उज्यालो नेपाल अभियानलाई सफल पार्न निर्देशन दिएको थियो । पछिल्ला दिनमा बिजुली आपूर्तिमा गडबढ देखिँदा सरकारमाथि नै गम्भीर प्रश्न सिर्जना हुँदै आएको छ । प्राधिकरणले अघोषित रुपमा लोडसेडिङ गरी समस्या सिर्जना गरिरहेको आरोप पनि लागेको छ ।