काठमाडौं, ३ माघ ।  नेपाल कम्युनिष्ट पार्टी (नेकपा) प्रचण्ड –नेपाल समूहका अध्यक्ष माधवकुमार नेपालले अब लोकतन्त्र जोगाउन नेपाली कांग्रेससँग मिलेर संयुक्त आन्दोलन गर्ने तयारी भइरहेको बताउनुभयो ।

शनिबार दाङको घोराहीमा प्रेस संगठन दाङले आयोजना गरेको पत्रकार भेटघाट कार्यक्रमलाई सम्बोधन गर्दै पूर्व प्रधानमन्त्रीसमेत रहेका नेपालले लोकतन्त्र रक्षाको लागि लामो समयदेखि संघर्षरत नेपाली कांग्रेस अब फेरि लोकतन्त्र जोगाउने जिम्मेवारीमा अग्रसर हुने आशा व्यक्त गर्नुभयो । उहाँले लोकतन्त्र जोगाउने जिम्मेवारी फेरि पनि कांग्रेस र हाम्रो काँधमा आएको बताउदै ‘त्यसका लागि कांग्रेससँग कुरा भइसकेको छ र अन्य दलसँग पनि संयुक्त आन्दोलनको लागि वार्ताको तयारी भइरहेको उहाँले बताउनुभयो । नेपाली कांग्रेसका सभापति शेरबहादुर देउवालाई भेटेपछि सकारात्मक माहोल बनेको भन्दै नेकपा अध्यक्ष नेपाललले प्रधानमन्त्री केपी ओलीको अलोकतान्त्रिक र असंवैधानिक कदमविरुद्ध संयुक्त रुपमा मिलेर आन्दोलन गर्ने वातावरण निर्माण हुन थालेको बताउनुभयो । उहाँले कांग्रेस सभापति देउवासँगको भेटपछि आन्दोलन बारे कांग्रेस सकारात्मक रहेको दाबी समेत गर्नुभयो ।

त्यस्तै उनले नेता बामदेव गौतमले पार्टी एकताका लागि गर्ने भनेको प्रयास सम्भव नरहेको ठोकुवा गर्नुभयो । त्यस्तै अध्यक्ष नेपालले पुष्पकमल दाहाल प्रचण्डलाई इमान्दार र बफादार नेताको संज्ञा समेत दिनुभयो । केपीको कदम असंवैधानिक र अलोकतान्त्रिक रहेको भन्दै आन्दोलनबाट त्यो करेक्सन गर्ने दाबी गर्नुभयो । तुलसीपुरमा प्रतिनिधिसभा विघटन विरूद्ध प्रचण्ड– नेपाल समूहको नेकपा दाङले आयोजना गरेको कार्यकर्ता प्रशीक्षण कार्यक्रमलाई सम्वोधन गर्न अध्यक्ष नेपाल, प्रवक्ता नारायणकाजी श्रेष्ठ, स्थायी कमिटी सदस्य तथा पूर्व सभामुख कृष्णबहादुर महरा, पूर्व मन्त्री तथा स्थायी कमिटी सदस्य वर्षमान पुन, स्थायी कमिटी सदस्य युवराज ज्ञवाली लगायतका नेताहरू शुक्रबार दाङ पुग्नु भएको हो ।