काठमाडौँ, ७ माघ । मुस्ताङको कैसाङस्थित उच्चशिखर तालिम शिक्षालयबाट हिमाली युद्धकला प्रशिक्षण प्राप्त नेपाली शान्ति सेना सिरियाको हिमवर्ती क्षेत्र गोलान हाइटको माउण्ट हर्मनमा खटिएको छ ।
नेपाली सेनाका अनुसार संयुक्त राष्ट्र संघीय (युएन) शान्ति मिसन अन्तरगत द्वन्द्वग्रस्त मुलुक सिरियामा परिचालित शान्ति सेनाले २० फिट हिँउ र माइनस २० डिग्री सेण्टिग्रेड चिसोमा नियमित सुरक्षा गस्ती समेत गर्ने गरेको छ ।

गोलान हाईट क्षेत्रको स्वामित्वको विषयलाई लिएर सिरिया र ईजरायलबीच विगत ४६ वर्षदेखि विवाद जारी छ । दुई देशको बीचमा पर्ने उच्च हिमाली तथा अतिसम्वेदनशील क्षेत्रमा नेपाली शान्ति सेना परिचालन भएको हो ।

सैनिक प्रवक्ता सन्तोषबल्लभ पौडेलले गोलान हाईटको माउण्ट हर्मन क्षेत्रमा अहिले पनि विद्युतीय धराप र युद्धरत सशस्त्र समूहको चलखेल हुने गरेको जानकारी दिनुभयो । त्यस क्षेत्रमा खटिएको शान्ति सेना हिमाली युद्धकला प्राप्त जनशक्ति हो ।

नेपाली शान्ति सेनाले बाक्लो हिम क्षेत्रमा प्रयोग हुने साधनहरु पिस्टन बुली, स्किडो र स्कीको प्रयोगबाट सुरक्षा गस्ती गर्दै आएको सेनाले जनाएको छ । नेपाली शान्ति सेनाको साहसिक कार्य, पेशागत दक्षता र विश्वसनियताको युएन र सिरिया सरकारले प्रशंसा गरेको छ ।

त्यस्तैं, सैनिकका लागि आवश्यक ‘हिमाली युद्धकला’ प्रशिक्षणका लागि मुस्ताङस्थित सेनाको उच्च शिखर तालिम शिक्षालय विश्वकै नमूना केन्द्रको रुपमा परिचित छ । उक्त शिक्षालयमा विदेशी सेना समेत प्रशिक्षण लिन आउने गरेको सेनाले जनाएको छ ।