काठमाडौं, ८ माघ ।  नेपाल कम्युनिष्ट पार्टी नेकपाका अध्यक्ष तथा प्रधानमन्त्री केपी शर्मा ओलीले प्रचण्ड– नेपाल समूहले देशलाई अन्धकारतर्फ धकेल्ने कोसिस गरेको आरोप लगाउनुभएको छ ।  आज राजधानीमा आयोजित आफू निकट प्रेस संगठनको दोस्रोे राष्ट्रिय भेलालाई सम्बोधन गर्दै ओलीले दाहाल–नेपालसमूहले चलचित्रमा जस्तै तमासा देखाएको पनि आरोप लगाउनुभएको हो । दाहाल–नेपालसमूहतर्फ कटाक्ष गर्दै ओलीले आफूहरु आवेश, उत्तेजना, आक्रोश र प्रतिसोधमा पनि नभएको बताउ“दै भन्नुभयो– हामी रातो झन्डा फहराउनेवाला हौं ।

पेरिसडाडामा जस्तो कालो झन्डा फहराउने होइनौं । रातो बेलुन उडाउने वाला हौं, कालो बेलुनवाला होइनौं । हामी सडकमा हिँड्दा रातो झन्डा बोक्ने वाला हौं, कालो झन्डा बोक्ने वाला होइनौं । ओलीले आफूहरु आफ्नोे गन्तव्यमा स्पष्ट पार्दै भन्नुभयो–देशलाई बनाउनुछ, सुशासानको बाटोमा लैजानु छ ।

यसका लागि भ्रष्टाचार समाप्त पार्नुछ । हामी हाम्रो उद्देश्य, गन्तव्य, बाटोमा स्पष्ट छौं । देश बनाउन यही गन्तव्यमा हिंडनुछ ।’ओलीले प्रचण्ड– नेपालसमूहले चलचित्रमा जस्तै तमासा देखाएको आरोप थियो । ‘समाजमा विभिन्न शक्ति, तत्व र व्यक्ति हुन्छन् । उनीहरु स्वार्थका लागि अनेकप्रकारका हाउभाउ गर्छन । जनतालाई सिनेमा देखाउँछन् । हिरो हुन्छ, हिरोइन हुन्छ । उनीहरुबीच लभ परेको हुन्छ । हिरोइन घाइते हुन्छ । हिरो ब्याकुल हुनछ, रुन्छ । तर, वास्तवमा केही होइन । न लभ परेको हो, न घाइते भएको हो । सबै तमासा हो । केही मान्छे नाटक देखाउँन आउछन् । तमासा गर्छन, जनतालाई झुक्काउँछन् । हामीले जनतलाई उनीहरुको तमासाबाट सचेत गराउनुपर्छ ।’