काठमाडौं, २४ माघ । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल (प्रचण्ड)ले मुलुकलाई दक्षिणपन्थी र वामपन्थी अतिवादले सताउने खतरा भएको बताउनुभयो । खाली वामपन्थी अतिवादमात्र हुन्छ भन्ने होइन, दक्षिणपन्थी अतिवाद पनि हुन्छ। दक्षिणपन्थी अतिवादले टाउको उठाउने र सताउने या वामपन्थी अतिवादले पनि टाउको उठाउने र सताउने स्थिति आउने खतरा छ, ​शनिबार काठमाडौंमा आयोजित एक कार्यक्रमलाई संबोधन गर्दै प्रचण्डले भन्नुभयो ,त्यसैले मेरो विनम्र आग्रह के छ भने यो आन्दोलनलाई सामान्य नठानौँ।

सम्बोधनका क्रममा उहाले सबै नेता एउटै त हुन् भन्ने नसोच्न आग्रहसमेत गरे। पार्टीभित्रैबाट आफूलाई असहयोग भयो भन्ने प्रधानमन्त्री केपी शर्मा ओलीको आरोपमाथि प्रतिप्रश्न गर्दै दाहालले भने, सरकारको कुन नीति, कार्यक्रम र योजनामा हामीले सहयोग गर्‍यौँ ? आफूहरूको अहिलेको लडाइँ पदका लागि नभई लोकतान्त्रिक गणतन्त्रको रक्षाका लागि भएको पनि प्रचण्डले दाबी गर्नुभयो । प्रतिनिधि सभा विघटनको निर्णयविरुद्ध सबै एकजुट रहेको उल्लेख गर्दै उहाले हिंसात्मक नभई शान्तिपूर्ण आन्दोलनमा रहेको, तर अहिलेको लडाइँलाई सामान्य रूपमा नलिन आग्रहसमेत गर्नुभयो ।

‘हामी अन्तिमसम्म जान्छौँ, उहाँले भन्नुभयो, ‘मैले यसो भन्दा फेरि प्रचण्ड हिंसात्मक आन्दोलनमा जान्छ कि भन्ने कतिलाई लाग्न सक्छ, म प्रष्ट रूपमा भन्न चाहन्छु(हामी शान्तिपूर्ण प्रतिस्पर्धाको राजनीतिमा प्रतिवद्ध भयौँ, चुनाब लड्यौँ, म आफैँ तीन पटक चुनाव लडेँ, दुईपटक प्रधानमन्त्री भएँ, त्यसकारण अब फेरि हिंसा, फेरि युद्ध हुँदैन, तर लोकतन्त्र, संविधान र शान्तिको हत्या भयो भने हामी नभए को हुन्छ ? पार्टीको बैठक बसौँ भन्दा नेकपा अध्यक्षसमेत रहेका ओलीले नमानेपछि अन्तरसङ्घर्ष झन् बढ्दै गएको उहाले बताउनुभयो । सरकारले पार्टीको घोषणापत्र अनुसार काम नगरेपछि आफूहरू विरोधमा उत्रिएको प्रचण्डले दाबी गर्नुभयो । ‘पार्टी एकता गरेको भोलिपल्ट देखि नै बहस शुरू भएको हो, पहिलो बजेट र नीति कार्यक्रम नै पार्टीभित्र छलफल नगरी ल्याइयो, प्रचण्डले थप्नुभयो , ‘दोस्रो र तेस्रो बजेट पनि त्यसैगरी आयो, तपाईंहरूले नोट गर्नुभएको छ भने हेर्न सक्नुहुन्छ त्यतिबेला पार्टीका सांसदहरूले संसदमा आफूलाई रोक्नै सक्नुभएन, यो बजेट हाम्रो त होइन, कस्को हो भनेर बोल्नु त भएको थियो, तर गुठी र मिडिया विधेयकलगायत सरकारले ल्याएका विधेयक आम जनता र पार्टीकै इच्छा अनुसारका होइनन्‌।

सरकार गठनको शुरूदेखि नै प्रधानमन्त्री ओली पार्टीबाट निर्देशित नरहेको उहाँले दावी गर्नुभयो । पहिलो, दोस्रो र तेस्रो वर्षको बजेट पनि पार्टीको नीति र घोषणा पत्रअनुसार नआएपछि त्यतिबेलादेखि नै पार्टीका नेताहरूले असन्तुष्टि राख्दै आएको प्रचण्डले बताउनुभयो ।