काठमाडौं, १९ चैत्र । सर्वोच्च अदालतले नेकपा एमाले र माओवादी केन्द्र ब्युँताउने आफ्नो फैसलामा पुनरावलोकन नगर्ने फैसला गरेको छ । नेता माधवकुमार नेपालको सहमतिमा पुनरावलोकन गर्न माओवादी केन्द्र अदालत पुगेको थियो ।
प्रधानन्यायाधीश चोलेन्द्रशम्शेर जबरा न्यायाधीशहरु तेजबहादुर केसी र प्रकाशकुमार ढुंगानाको इजलासले माओवादी केन्द्रका अध्यक्ष पुष्पकमल दाहाल प्रचण्डले दिएको पुनरावलोकन निवेदन सुनुवाईका लागि अनुमति नदिएको हो । योसँगै एमाले र माओवादी केन्द्र अब अलग अलग हुने भएका हुन् ।
सर्वोच्च अदालतका सहायक प्रवक्ता देवेन्द्र ढकालले अब यो मुद्दामा पुनरावलोकन नहुने आदेश भएको जानकारी दिनुभयो । ‘अब यो मुद्दाको सम्पूर्ण प्रक्रिया यहीं सकिएको छ । पुनरावलोकन नगर्ने आदेश भएपछि अब थप सुनुवाइ गर्नैपरेन’, ढकालले भन्नुभयो ।
प्रतिक्रिया दिनुहोस्