काठमाडौं, ७ पुस । म्यानचेस्टर सिटी आर्सनलका स्ट्राइकर एलेक्स सान्चेजलाई क्लब भित्र्याउन अझै इच्छुक रहेको छ ।

तर यो प्रक्रिया आउँदो जनवरी विन्डोमा भने नहुने देखिएको छ । यो सिजनको सुरुको ग्रिष्म ट्रान्सफर विन्डोमा म्यानचेस्टर सिटी सान्चेजलाई अनुबन्ध गर्न विन्डोको अन्तिम दिन तयार भएको थियो । तर त्यसबेला आर्सनल सान्चेजको ठाउँमा आउने खेलाडी टुंग्याउन नसक्दा अनुबन्ध प्रयास असफल भएको थियो । आर्सनलले मोनाकोका थोमस लेमारलाई ल्याउन प्रयास गरेको थियो । म्यानचेस्टर सिटीका प्रशिक्षक पेप गार्डिवलाले आउँदो १८ महिनामा गर्न सकिने खेलाडी अनुबन्ध र त्यसका लागि आफ्नो प्राथमिकताका बारेमा छलफल गरेका छन् । त्यस क्रममा सिटी अझै पनि सान्चेजलाई भित्र्याउन इच्छुक रहेको देखिएको हो । जनवरीमै सान्चेज सिटी जाने खबर आइरहेका छन् । आर्सनलले पनि सान्चेजलाई क्लबमा राखिरहनु घातक हुन सक्ने भन्दै आउँदो महिना नै सिटीसंग अनुबन्ध सम्झौता गर्ने तयारी गरेको छ । तर त्यसका लागि सिटीले नभइ ग्रिष्म विन्डोसम्म पर्खिने तयारी गरेको बुझिएको छ । किनकी सान्चेजलाई सिजनको बिचमा ल्याउँदा क्लबभित्र विवाद हुन सक्ने प्रशिक्षक गार्डिवलाले देखेका छन् । सिटी र आर्सनल सान्चेजको विषयमा सहमत भएका थिए, तर त्यसका लागि आर्सनलले सान्चेजको ठाउँमा आउने खेलाडी टुंगो लाग्नुपर्ने अवस्था राखेको थियो । आर्सनल थोमस लेमारलाई अनुबन्ध गर्न असफल भएपछि बार्सिलोनाका पूर्व खेलाडी सान्चेजको म्यानचेस्टर सिटी यात्रा रोकिएको थियो ।