काठमाडौं, १४ बैशाख ।पछिल्लो समय कोरोना भाइरस सङ्क्रमणको भयावह अवस्थासँग जुधिरहेको छिमेकी मुलुक भारतमा ज्यान गुमाउने सङ्क्रमितको सङ्ख्या दुई लाखनजिक पुगेको छ ।

केही समययता भारतमा दैनिक दुई हजारभन्दा बढी सङ्क्रमितको मृत्यु भइरहेको छ । तीन लाखभन्दा बढी सङ्क्रमित थपिने गरेका छन् । एकै दिन दुई हजार सात सय ६४ जनाको मृत्यु भएसँगै भारतमा हालसम्म ज्यान गुमाउनेको सङ्क्रमितको सङ्ख्या एक लाख ९७ हजार आठ सय ८० पुगेको छ । भारतमा दैनिक अन्य मुलुकमा भन्दा धेरै सङ्क्रमितले ज्यान गुमाइरहेका छन् ।

पछिल्लो २४ घण्टामा तीन लाख १९ हजार चार सय ३५ जना नयाँ बिरामी थपिए । यो सङ्ख्या अन्य मुलुकमा फेला परेका सङ्क्रमितको भन्दा अत्याधिक धेरै हो । सङ्क्रमित सङ्ख्या एक करोड ७६ लाख २५ हजार सात सय ३५ पुगेको छ । सङ्क्रमितमध्ये एक करोड ४५ लाख ४५ हजार तीन सय ४२ जनाको उपचार सम्भव भएको छ ।

उपचार सम्भव भएकाहरु कोरोनामुक्त हुँदै सामान्य जीवनमा फर्किएका छन् । २८ लाख ८२ हजार पाँच सय १३ जना सङ्क्रमितको उपचार जारी छ । उपचाररतमध्ये आठ हजार नौ सय ४४ जनाको अवस्था चिन्ताजनक छ । भारत कोरोनाका कारण प्रभावित हुनेमध्ये विश्वकै दोस्रो नम्बरमा रहेको मुलुक हो ।

कोरोनाका कारण प्रभावित हुनेमध्ये विश्वकै पहिलो नम्बरमा रहेको मुलुक अमेरिकामा एकै दिन चार सय १० जना सङ्क्रमितले ज्यान गुमाए । हालसम्म मृत्यु हुने सङ्क्रमितको सङ्ख्या पाँच लाख ८६ हजार पाँच सय ६७ पुगेको छ । पछिल्लो २४ घण्टामा ४१ हजार नौ सय ४० जना नयाँ बिरामी थपिए ।

सङ्क्रमित सङ्ख्या तीन करोड २८ लाख ६७ हजार सात सय आठ पुगेको छ । सङ्क्रमितमध्ये दुई करोड ५४ लाख ६६ हजार पाँच सय १९ जना उपचारपछि निको भएका छन् । ६८ लाख १४ हजार छ सय १२ जनाको उपचार जारी रहेकोमा नौ हजार आठ सय ८२ जनाको अवस्था गम्भीर छ । अमेरिकामा केही दिनयता दैनिक थपिने र ज्यान गुमाउने कोरोना सङ्क्रमितको सङ्ख्या कम हुँदै गइरहेको छ ।

कोरोनाबाट प्रभावित हुनेमध्ये विश्वकै तेस्रो नम्बरमा रहेको मुलुक ब्राजिलमा एकै दिन एक हजार ११ सङ्क्रमितले ज्यान गुमाए । हालसम्म मृत्यु हुनेको सङ्ख्या तीन लाख ९१ हजार नौ सय ३६ पुगेको छ । पछिल्लो २४ घण्टामा २८ हजार छ सय ३६ नयाँ बिरामी थपिएपछि सङ्क्रमित सङ्ख्या एक करोड ४३ लाख ६९ हजार चार सय २३ पुगेको छ ।

सङ्क्रमितमध्ये एक करोड २८ लाख ७९ हजार ५१ जनाको उपचार सफल भएको छ । सफल उपचार भएकाहरु कोरोनामुक्त हुँदै निको भएर घर फर्किएका छन् । १० लाख ९८ हजार चार सय ३६ जनाको उपचार जारी रहेकोमा आठ हजार तीन सय १८ जनाको अवस्था चिन्ताजनक छ । ब्राजिलमा पनि केही दिनयता दैनिक मृत्यु हुने र थपिने कोरोना सङ्क्रमितको सङ्ख्या कम हुँदै गइरहेको छ ।

विश्वमा एकै दिन नौ हजार नौ सय २३ सङ्क्रमितको मृत्यु भयो । हालसम्म ज्यान गुमाउने सङ्क्रमित सङ्ख्या ३१ लाख ३२ हजार चार सय ६२ पुगेको छ । पछिल्लो २४ घण्टामा छ लाख ४९ हजार एक सय १७ जना नयाँ बिरामी थपिए । सङ्क्रमित सङ्ख्या १४ करोड ८४ लाख ४५ हजार एक सय सात पुगेको छ । सङ्क्रमितमध्ये १२ करोड ६५ लाख २४ हजार नौ सय २८ जना उपचारपछि निको भएका छन् ।

एक करोड ८७ लाख ८७ हजार सात सय १७ जनाको उपचार जारी छ । उपचाररतमध्ये एक लाख १० हजार नौ सय ४६ जनाको अवस्था गम्भीर छ । विश्वमा केही दिनयता दैनिक थपिने र ज्यान गुमाउने कोरोना सङ्क्रमितको सङ्ख्या कम हुँदै गइरहेको छ । यसअघि दैनिक सात लाखभन्दा बढी सङ्क्रमित थपिने गरेका थिए भने १० हजारभन्दा बढीको ज्यान जाने गरेको थियो ।