काठमाडौं, ९ पुस । ह्यारी केनको कीर्तिमानी प्रदर्शनसंगै टोटनह्यामले इंग्लिस प्रिमियर लिग अन्तर्गत गएराति भएको खेलमा महत्वपूर्ण जित दर्ता गरेको छ ।

अवे मैदानमा भएको खेलमा माउरिसिओ पोकेटिनाको टिम टोटनह्यामले बर्नलीलाई ३–० ले हराएको हो र तीनै गोल केनले गरेका हुन् । सातौं मिनेटमा पाएको पेनाल्टीमा गोल गर्दै केनले टोटनह्यामलाई सुरुवाति अग्रता दिलाए । पहिलो हाफमा १–० ले अघि रहेको टोटनह्यामका लागि दोस्रो हाफमा केनले थप दुई गोल गरे । ६९ औं मिनेटमा व्यक्तिगत दोस्रो गोल गर्दै अग्रता दोब्बर पारेका केनले त्यसको १० मिनेटपछि गोल गर्दै ह्याट्रिक पूरा गरे । ह्याड्रिकसंगै केनले एक वर्षमा प्रिमियर लिगमा सबैभन्दा धेरै गोल गर्ने एलन शिएररको कीर्तिमानसंग बराबरी गरेका छन् । शिएररले २२ वर्षअघि सन् १९९५ मा एक वर्षमा प्रिमियर लिगमा ३६ गोल गरेर कीर्तिमान बनाएका थिए । केनले बर्नलीसंगको खेलमा गरेको गोल प्रिमियर लिगमा सन् २०१७ मा गरेको उनको ३४ औं, ३५ औं र ३६ औं गोल हो । केनको उत्कृष्ट प्रदर्शनसंगै जित निकालेको टोटनह्याम अंक तालिकाको पाँचौं स्थानमा पनि उक्लिएको छ । टोटनह्यामको १९ खेलबाट ३४ अंक भएको छ । बर्नली ३२ अंकसहित सातौं स्थानमा छ । खेलपछि बर्नलीका प्रशिक्षक शन डिचले केनले टोटनह्यामलाई राम्रोबाट वास्तवमै राम्रो टिम बनाएको भन्दै प्रशंसा गरेका थिए ।