काठमाडौं, २४ बैशाख । औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेतको पहलमा दैलेखमा १५ थान अक्सिजन सिलिण्डर सहयोग गर्नुभएको छ । सरकारी अस्पताललाई निःशुल्क रुपमा अक्सिजन उपलब्ध गराउने अभियानअन्तरगत स्वास्थ्य सेवा कार्यालय दैलेखलाई सहयोग गरिएको हो ।

कोरोना महामारीको समयमा अक्सिजन अभाव हुन नदिन र अस्पतालमा उपचारार्थ भर्ना भएका बिरामीको ज्यान जोगाउन अक्सिजनले सघाउ पुर्‍याएको स्वास्थ्य सेवा कार्यालय दैलेखका निमित्त कार्यालय प्रमुख थीरप्रसाद रेग्मीले बताउनुभयो । जिल्लामा अक्सिजनको अभाव रहेको अवस्थामा अक्सिजन अभावका कारण ज्यान गुमाउनु नपरोस् भन्नका लागि व्यक्तिगत रुपमा अक्सिजन सिलिण्डर व्यवस्थापनमा लागि परेको औद्योगिक क्षेत्र व्यवस्थापन लिमिटेडका अध्यक्ष बस्नेतले बताउनुभयो । दैलेख जिल्लामा थप अक्सिजन सिलिण्डर पठाउन पहल  गरिरहेको उहाँले बताउनुभयो । उहाँले दैलेख जिल्लामा कुनै पनि कोरोना संक्रमितले अक्सिजन अभावमा ज्यान गुमाउन नपरोस भन्ने हेतुले आफुले सक्दो सहयोग गर्ने प्रतिवद्धता समेत जनाउनुभयो ।