काठमाडौं, १३ पुस । इंग्लिस प्रिमियर लिगमा आफ्नै कीर्तिमान भंग गरेर नयाँ कीर्तिमान बनाउँदै आएको पेप गार्डिवलाको टिम म्यानचेस्टर सिटीले १५ अंकको अग्रता कामय गरेको छ ।

प्रिमियर लिग अन्तर्गत गएराति भएको खेलमा म्यानचेस्टर सिटीले न्युक्यासल युनाइटेडलाई १–० ले हराएर दोस्रो स्थानको म्यानचेस्टर युनाइटेडसंगको अंक दूरी १५ मा र्पुयाएको हो । अवे मैदानमा भएको खेलमा म्यानचेस्टर सिटीको जितमा ३१ औं मिनेटमा रहिम स्ट्रर्लिङले गरेको गोल नै निर्णायक बन्यो । म्यानचेस्टर सिटीले खेलमा अधिकांश समय बलमा नियन्त्रण बनाए पनि थप गोल भने गर्न सकेन । उसले २१ पटक र न्युक्यासलले ६ पटक पोस्टर प्रहार गरेको थियो । यो म्यानचेस्टर सिटीको लिगमा लगातार १८ औं जित हो । उसले प्रिमियर लिगमा समग्र तथा एकै सिजनमा लगातार धेरै खेल जित्ने कीर्तिमानलाई बढाउँदै लगेको छ । जितपछि शीर्ष स्थानको म्यानचेस्टर सिटीको २० खेलबाट ५८ अंक भएको छ । दोस्रो स्थानको म्यानचेस्टर युनाइटेडको ४३ अंक छ । १५ औं स्थानमा रहेको न्युक्यासलको १८ अंक रहेको छ ।

एबीसी रिर्पोटर