काठमाडौं, १७ पुस । गत १० र २१ मंसिरमा भएको प्रदेशसभा र प्रतिनिधिसभाको निर्वाचन परिणाम तत्काल सार्वजनिक गर्न वाम गठबन्धनका भातृसंगठनहरुले निर्वाचन आयोगको ध्यानाकर्षण गराएका छन् । उनीहरूले वाम गठबन्धनले बहुमत ल्याएको बेला परिणाम सार्वजनिक गर्न आनाकानी गरेको भन्दै रोष प्रकट गरे ।

निर्वाचन आयोगका प्रमुख आयुक्त डा. अयोधिप्रसाद यादवलाई उनकै कार्यकक्षमा भेटी निर्वाचन परिणाम तत्काल सार्वजनिक गरेर नयाँ सरकार निर्माणमा सहयोग पुर्‍याउन आग्रह गरेको अखिल (क्रान्तिकारी) का उपाध्यक्ष सुरेन्द्र बस्नेतले जानकारी बताएका छन् ।

यादवले सिंगो संसदमा ३३ प्रतिशत महिलाको प्रतिनिधित्व सुनिश्चितता गराउनुपर्ने संबैधानिक प्रावधान भएको र राष्ट्रिय सभाको निर्वाचनमा महिलाको प्रतिनिधित्व कम भएमा समानुपातिक मार्फत ३३ प्रतिशत पुर्‍याउनुपर्ने भएकाले परिणाम सार्वजनिक गर्न केही ढिलाई भएको बताएका थिए ।

उनले भने,‘सिंगो संसदमा प्रत्येक राजनीतिक दलबाट ३३ प्रतिशत महिलाको प्रतिनिधित्व ग्यारेन्टी हुनुपर्छ । मानौ, कुनै दलका महिलाले राष्ट्रिय सभा निर्वाचनमा पराजित भए भने त्यो दलले प्रतिनिधिसभाबाट त्यसको क्षतिपूर्ति गर्नुपर्छ । त्यसैले पहिला राष्ट्रिय सभाको निर्वाचन पहिला हुनु जरुरी छ ।’ ज्ञापनपत्र बुझाउन एमाले निकट युवासंघ र अनेरास्ववियु, माओवादी केन्द्र निकट वाइसिएल र अखिल (क्रान्तिकारी) का नेताहरु निर्वाचन आयोगको कार्यालय पुगेका थिए ।