पूर्वी नेपालको इटहरीमा १२ औं अन्तर्राष्ट्रिय खुल्ला मैत्री तेक्वान्दो प्रतियोगिता आयोजना गरिएको छ । नयाँ बर्ष २०१८ को पहिलो दिन सोमबार इटहरी रंगशालाको कभर्डहलमा प्रतियोगिताको उद्घाटन गरिएको हो ।

झण्डै १ दर्जन देशका ७ सयभन्दा धेरै खेलाडी सहभागी प्रतियोगिताको उद्घाटन समारोहमा खेलकुदमन्त्री राजेन्द्र कुमार केसी, राष्ट्रिय खेलकुद परिषदका सदस्य सचिव केशव कुमार बिष्ट, अन्तर्राष्ट्रिय खुल्ला मैत्री तेक्वान्दो प्रतियोगिता मुख्यालय पोर्टल्याण्डकी करेन ब्ल्याकलेज, राजनीतिक दलका नेताहरु, सांसद, स्थानीय जनप्रतिनिधिहरु, विश्वभरबाट प्रतियोगितामा सहभागी हुन उपस्थीत खेलाडीहरु, प्रशिक्षकहरु, रेफ्रीहरु, संचारकर्मी र दर्शकहरुको सहभागिता रहेको थियो ।

आयोजक कमिटिका संयोजक राष्ट्र राई र ग्रयाण्डमास्टर दिवाकार डान महर्जनको विशेष सकृयतामा अन्तर्राष्ट्रिय तेक्वान्दो प्रतियोगिताको आयोजना गरिएको हो । महर्जन सन् २००० देखि नै अन्तर्राष्ट्रिय खुल्ला मैत्री तेक्वान्दो प्रतियोगिताका प्रतियोगिता निर्देशक हुन् ।