काठमाडौँ, २२ पुस ।मंसिर १० र २१ गते प्रदेश सभा र प्रतिनिधी सभाको निर्वाचन सम्पन्न गरे सगै प्रतिनिधी सभाको समानुपातीक तर्फको नतिजा सार्वजनिक नगरेको निर्वाचन आयोगले राष्ट्रिय सभा निर्वाचनको तयारी शुरु गरेको छ । भोलीसम्म चुनावको कार्यतालिका सार्वजनिक गर्नेगरी आयोगले आजैदेखि तयारी थालेको आयोगका प्रवक्ता नवराज ढकालले जानकारी दिए ।

सरकारले शुक्रबार राष्ट्रिय सभा निर्वाचनको मिति २४ गतेकालागि तोकेपछि आयोगले आफ्नो तयारी अगाडि बढाएको हो । दल दर्ताका लागि पुस १३ गते नै १५ दिने सूचना जारी गरिसकेको आयोगले कार्यतालिका सार्वजनिक गरिसकेपछि सोही अनुसार काम गर्दै जाने जनाएको छ ।

राष्ट्रिय सभा निर्वाचनको सम्पूर्ण प्रक्रिया पनि अन्य निर्वाचन जस्तै भएकाले आयोगले तालिका बनाएरै काम गर्नेछ ।
कार्यतालिका प्रकाशित भएपछि मतदाता नामावली संकलन, निर्वाचन अधिकृतको नियुक्ती, चुनावमा भाग लिने दलहरुसँग आधिकारिक हस्ताक्षर माग, मतदाता शिक्षा कार्यक्रम संचालन, उम्मेदवारी दर्ता लगायतका गतिविधि गर्दै जाने प्रवक्ता ढकालले बताए । एकल संक्रमणीय मत प्रणालीका आधारमा गरिने निर्वाचनमार्फत राष्ट्रिय सभामा प्रत्येक प्रदेशबाट ८ जनाका दरले ५६ जना निर्वाचित हुनेछन् ।

एकल संक्रमणीय प्रणालीमा एउटा उम्मेदवारले प्राप्त गरेको बिजयी हुन आवश्यक भन्दा बढी मत अर्को उम्मेदवारमा सर्दै जान्छ । प्रत्येक प्रदेशमा हुने निर्वाचनमा गाउँपालिका अध्यक्ष र उपाध्यक्ष, नगरपालिका प्रमुख तथा उपप्रमुख गरी १५ सय ६ जना र ३ सय ३० जना प्रदेश सांसदले भोट हाल्न पाउनेछन् ।

५९ सदस्यीय राष्ट्रिय सभामा ३ जना सरकारको सिफारिसमा राष्ट्रपतिले मनोनित गर्ने व्यवस्था छ । स्थानीय तहका प्रमुखरउपप्रमुखको एक जना बराबर १८ र प्रदेश सांसदको एक जना बराबर ४८ मत गणना हुनेछ ।