बैतडी, २२ पुष । चार वर्षको समयमा प्रदेश नम्बर सातबाट अख्तियार दुरुपयोग अनुसन्धान आयोगमा भ्रष्टाचार सम्बन्धि तीन हजार ६ सय वढि उजुरी परेको तथ्यांक सार्वजनिक भएको छ ।

०७० सालदेखि ०७४ मंसिर मसान्तसम्म सुदूरपश्चिमका ९ वटै जिल्लाबाट तीन हजार ६ सय ६३ वटा भ्रष्टाचारका उजुरी परेको अख्तियार दुरुपयोग अनुसन्धान आयोगको कार्यालय कञ्चनपुरले जनाएको छ ।

बैतडीमा कर्मचारी, नागरिक समाज र संचारकर्मीसँग अन्तरक्रिया कार्यक्रम गर्दै कार्यालयले पछिल्लो अवस्थाबारे जानकारी गराएको हो । कार्यालयको तथ्याङ्क अनुसार बैतडीबाट अख्तियारमा ४ सय ३१ वटा उजुरी परेको छन् ।

पछिल्लो एक वर्षको अवधीमा बैतडीबाट ४८ उजुरी थपिएका हुन् । सात नम्बर प्रदेशको कैलालीबाट सबैभन्दा बढि १ हजार ४० उजुरी परेका छन् । यस्तै कञ्चनपुरबाट ८ सय ९५, डोटीबाट २ सय ९३, डडेल्धुराबाट २ सय ९७, दार्चुलाबाट २ सय २३, बझाङबाट २ सय ७, अछामबाट १ सय ६० र सबैभन्दा कम बाजुराबाट १ सय ३ उजुरी दर्ता भएका छन् ।

अन्तरक्रियामा भ्रष्टाचार नियन्त्रणमा अख्तियारको भूमिका विषयक कार्यपत्र प्रस्तुत गरिएको थियो । कार्यपत्र प्रस्तुत गर्दै अख्तियारको महेन्द्रनगर कार्यालयका प्रमुख विष्णु बिष्टले भ्रष्टाचार न्यूनिकरणका लागि समाजका सबै नागरिकले भूमिका खेल्नुपर्नेमा जोड दिए ।