काठमाडौं । हिउँदको महिना भएकाले जाडो बढ्दै गइरहेको छ । जाडोमा के खाने र कस्तो कपडा लगाउने चिन्ता सबैलाई हुन्छ । त्यसमाथि भित्रि पहिरन फेसनेवल र स्टाइस नै रोज्ने युवाहरु धेरै छन । बजारमा चल्तीमा आएका भित्रि कपडाले व्यक्तित्व झल्काउने मात्र होइन स्मार्ट पनि देखाउँछ ।

यस्ता कपडा लगाउनु भनेको जाडोबाट बच्नु मात्र होइन फेसनमा रमाउनु पनि हो । भित्रि कपडा न्यानो र कसिलो लगाइयो भने बाहिरबाट उकुसमुकुस हुने बाक्लो स्विटर वा ज्याकेटहरु लगाइरहनु पर्दैन । हल्का र छरितो कपडा बाहिरबाट लगाउँदा हिंडडुल गर्न सहज हुन्छ ।नेपाली बजारमा धेरै किसिमका भित्रि पहिरनहरु उपलब्ध छन । जाडो मौसम सुरु हुनासाथ यस्ता कपडाहरुको माग बढ्ने गर्छ । ठूला व्यापारिक मल वा कम्प्लेक्सहरुमा ब्रान्डेट भित्रि पहिरनका छुट्टै पसलहरु संचालित छन ।

थर्मल थर्मकोट,

मोजा, हाइनेक, स्टकिङ, नाइट गाउन साथै इनरवेयर लगायतका पहिरनहरु जाडोमा धेरै विक्री हुने गर्छ । पसिना नगनाउने तथा एलर्जीको समस्या नहुने भएकाले फेसनएवल पुस्ताले ब्रान्डेट पहिरनहरु धेरै रुचाउने गरेको व्यापारीहरु बताउँछन ।

नेपाली बजारमा यस्ता कपडा बढी मात्रामा भारत, चीन, थाइल्याण्डबाट आउने गरेका छन् । जसमध्ये चीनमा उत्पादित कपडा बढी विक्री हुने गरेको छ । चीनबाट ६ सय ५० मा आउने भित्री कपडा जाडो मौसममा १५ सय रुपैंयासम्म विक्री हुन्छ ।

थर्मल

महिला र पुरुषका बजारमा उपलब्ध भइरहेको थर्मल जाडो मौसमा धेरै विक्री हुने पहिरन हो । बजारमा पाइने जक्की, डलर, अमूल, रोबर लगायत ब्राण्डका यस्ता पहिरन लगाउन सजिलो र न्यानो हुन्छ ।

महिलाहरुका लागि रातो, गुलाबी र प्याजी साथै पुरुषहरुका लागि खैरो, कालो र सेतो रङ्ग पुरुषहरू बढी विक्री हुन्छ । थर्मलको सेटलाई न्यूनतम एकहजार देखि १८ सय रुपैंयासम्म मूल्य पर्छ ।

स्टकिङ

महिलाहरुले जाडो महिनामा विशेष गरी स्टकिङ किन्न रुचाउँछन् । सजिलो र न्यानो भएकाले स्टकिङ पहिरिने युवतीहरुको संख्या धेरै छ । कतिपय व्यापारीहरु स्टकिङको बजार जाडोमा ५० प्रतिशतले बढेको बताउँछन ।
स्टकिङ जाडोमा न्यानो हुने मात्र नभइ फेसनबल समेत देखिन्छ । लंङ्गबुट, लङ्गहाइनेक र कोटसँग यसले खुबै म्याच गर्छ । आकर्षक डिजाइनका स्टकिङ बजारमा पाँचसय देखि १५ सयसम्ममा पाइन्छ ।

हाइनेक

हुनत बाहिरै लगाउन मिल्ने हाइनेकहरु पनि बजारमा उपलब्ध छन् । तर भित्र लगाउन मिल्ने र न्यानो हाइनेक पनि जाडो मौसममा रोजाइमा पर्छ । चीन तथा भारतबाट आयात गरिएका हाइनेकहरु सस्तो र न्यानो हुने भएकाले महिला र पुरुषहरुले रोज्ने गर्छन । फुटपातमा पनि राम्रा हाइनेकहरु पाइन्छ । सामान्य हाइनेकको मुल्य पाँचसय भन्दा माथि पर्छ ।

जाडो महिनामा इनरवेयरका पहिरनहरु पनि धेरैको रोजाइमा पर्छन । जक्की, अमुल, रोबर, भिक्टोरिक आदि ब्राण्डका इनरवेयरहरु बजारमा उपलब्ध छन् । यस्ता पहिरनहरु पुरुष र महिलाहरुको फरक फरक रोजाइमा पर्छन । स्टाइलिस र रङ्गीविरङ्गी कलरहरु महिलाहरुले धेरै रोज्छन भने पुरुषहरु ब्रान्डलाई प्राथमिकता दिने गरेको व्यापारीहरुको भनाइ छ ।

त्यसबाहेक पेन्टी, ब्रा, गन्जी, मोजाहरु पनि जाडोका लागि फरक डिजाइनमा उपलव्ध छन् । भित्र लगाउने ट्राउजरहरु विभिन्न डिजाइनमा पाइन्छ । काठमाडौंका दरबारमार्ग, ठमेल, न्यूरोड तथा विभिन्न व्यापारिक मलहरुमा यस्ता ब्रान्डेट पहिरनहरुको छुट्टै पसलहरु खुलेका छन् । अन्तराष्ट्रिय ब्रान्डका यस्ता पहिरन प्रति युवाहरुको रोजाई बढ्न थालेको छ ।