काठमाडौँ, ११ चैत । सत्तारुढ नेपाली कांग्रेसका सातमध्ये पाँच प्रदेश समितिका सभापति आसन्न स्थानीय तहको निर्वाचनमा गठबन्धन गर्न नहुने पक्षमा उभिएका छन्। पार्टी केन्द्रीय कार्यालय सानेपामा जारी केन्द्रीय कार्य समिति बैठकमा आमन्त्रितका रुपमा प्रदेश सभापतिहरूले आफ्ना भनाइ राख्दै गठबन्धनको विपक्षमा आफूलाई उभ्याएका हुन्।

गठबन्धनका विपक्षमा मधेस प्रदेशका कृष्ण यादव, गण्डकीका शुक्रराज शर्मा, लम्बिनीका अमरसिंह पुन, कर्णालीका ललितजंग शाही, सुदूरपश्चिमका वीरबहादुर बलायर उभिनुभएको हो। यीमध्ये लुम्बिनी र गण्डकी प्रदेशका सभापति गठबन्धन गर्नै नहुने पक्षमा देखिएका छन्। सुदुरपश्चिमका बलायर बैठकमा उपस्थित हुनुहुन्न। उहाँ गठबन्धनका विपक्षमा उभिनुभएको हो। कर्णालीका सभापति ललितजंग शाही माओवादीले दुःख दिएकाले स्थानीय आवश्यकताका आधारमा गठबन्धन गर्नपर्ने पक्षमा देखिनुभएको छ। केन्द्रबाटै गठबन्धनको निर्णय लिन नहुने उहाँको मत छ। प्रदेश २ का सभापति यादवले पनि गठबन्धन गर्दा स्थानीय आवश्यकतालाई प्रमुख आधार बनाउनुपर्ने बताउनुभएको छ।

प्रदेश १ का उद्धव थापा र बागमती प्रदेशका सभापति इन्द्र बानियाँ गठबन्धनको पक्षमा उभिनुभएको छ। उहाँहरुले एमाले कमजोर नभएको र मुख्य प्रतिस्पर्धा पनि एमालेसँगै रहेकाले सत्तासीनहरूबीच गठबन्धन हुनुपर्ने बताउनुभएको छ। आजको बैठकमा २० जिल्लामा खटिएका केन्द्रीय प्रतिनिधि, ६ प्रदेश सभापपति गण्डकीका मुख्यमन्त्रीले धारणा राख्नुभयो। भोलि शनिबार बिहान ११ बजे पुनः बैठक बस्नेछ। बैठकमा महामन्त्री गगन थापाले एजेन्डा प्रस्तुत गरेको केन्द्रीय सदस्य प्रकाश रसाइली स्नेहीले जानकारी दिनुभयो।