काठमाडौं । रसुवाका बाढीपीडितका लागि खर्च गर्ने उद्देश्यले प्रधानमन्त्री दैवी प्रकोप राहत कोषमा सोमबार एकैदिन ६० करोड २ लाख रुपैयाँभन्दा बढी सहयोग रकम संकलन भएको छ।

विभिन्न ८३ उद्योगी तथा व्यापारिक समूह र परोपकारी व्यक्तिहरूले अर्थमन्त्री डा. स्वर्णिम वाग्लेलाई चेक हस्तान्तरण गर्दै सरकारलाई उक्त रकम उपलब्ध गराएका हुन्।

अर्थ मन्त्रालयका अनुसार सोमबार हस्तान्तरण भएका चेकको कुल रकम ६० करोड २ लाख २० हजार १०६ रुपैयाँ ६२ पैसा रहेको छ। भदौ ११ गतेदेखि अर्थ मन्त्रालयमार्फत राहत तथा उद्धार कोषका लागि भौतिक रूपमा सहयोग रकम संकलन गर्न थालिएयता एकैदिन प्राप्त भएको यो सबैभन्दा ठूलो रकम हो।

यसअघि भदौ ११ गते २७ करोड ३३ लाख रुपैयाँ, भदौ १२ गते ३८ करोड ६० लाख ६४ हजार ३२४ रुपैयाँ, तथा भदौ १४ गते ४ करोड ७९ लाख रुपैयाँ र २ लाख अमेरिकी डलर सहयोग प्राप्त भएको थियो।

यससँगै चार दिनमा अर्थ मन्त्रालयमार्फत प्रधानमन्त्री राहत कोषमा कुल १ अर्ब ३० करोड ७५ लाख ८ हजार ६६१ रुपैयाँ जम्मा भएको मन्त्रालयको तथ्यांक छ।

प्राप्त रकममध्ये ८० हजार रुपैयाँ नगद रहेको र बाँकी रकम ‘एकाउन्ट पेयी’ चेकमार्फत प्राप्त भएको अर्थ मन्त्रालयले जनाएको छ। यसबाहेक २ लाख अमेरिकी डलरको चेक समेत मन्त्रालयमा प्राप्त भएको छ।

सरकारले संकलित रकम रसुवामा बाढीबाट प्रभावित नागरिकको राहत, उद्धार तथा पुनःस्थापनामा खर्च गर्ने जनाएको छ।

राहत कोषमा निजी क्षेत्रको बढ्दो सहयोग

भोटेकोशी बाढीबाट रसुवालगायतका जिल्लामा ठूलो जनधनको क्षति भएपछि सरकारले राहत तथा उद्धारका लागि आर्थिक सहयोग जुटाउन आह्वान गरेको थियो। त्यसपछि उद्योगी, व्यवसायी, संघसंस्था तथा परोपकारी व्यक्तिहरूले सरकारको राहत कोषमा सहयोग गर्ने क्रम बढेको छ।

सोमबार मात्रै ६० करोडभन्दा बढी रकम संकलन हुनुले विपद्का बेला निजी क्षेत्र तथा सर्वसाधारणबाट सरकारको राहत अभियानमा उल्लेख्य सहयोग जुटिरहेको देखाएको छ।

Originally published on abcnews.com.np.