काठमाडौं । गैरआवासीय नेपाली संघ (एनआरएनए) अन्तर्राष्ट्रिय समन्वय परिषद्ले बाढी तथा डुबानबाट प्रभावित नागरिकको राहत तथा उद्धारका लागि प्रधानमन्त्री दैवी प्रकोप उद्धार कोषमा १ करोड रुपैयाँ सहयोग गरेको छ।

एनआरएनए अध्यक्ष डा. हेमराज शर्मासहितको प्रतिनिधिमण्डलले परराष्ट्रमन्त्री शिशिर खनाललाई उक्त सहयोग रकम हस्तान्तरण गरेको हो।

संघका अनुसार एनआरएनएका पदाधिकारी तथा अभियन्ता र विभिन्न राष्ट्रिय समन्वय परिषद् (एनसीसी) मार्फत संकलन गरिएको रकममध्ये पहिलो चरणमा १ करोड रुपैयाँ राहत कोषमा हस्तान्तरण गरिएको हो। उक्त रकम कोषको खातामा जम्मा भइसकेको संघले जनाएको छ।

एनआरएनएले यसअघि बाढी तथा डुबानबाट प्रभावित नागरिकको राहत तथा मानवीय सहयोगका लागि कुल ५ करोड रुपैयाँ सहयोग गर्ने घोषणागरेको थियो।

संघले बाँकी रकमसमेत संकलन तथा व्यवस्थापन गरी प्रभावित नागरिकको राहत, उद्धार र पुनःस्थापनामा सहयोग गर्ने जनाएको छ। एनआरएनएले विपद्को समयमा स्वदेश तथा विदेशमा रहेका नेपाली समुदायलाई मानवीय सहयोगमा जुट्नसमेत आह्वान गरेको छ।

Originally published on abcnews.com.np.