काठमाडौं । रसुवाको टिमुरेमा खोज तथा उद्धारका क्रममा नेपाली सेनाले बैंकका पाँच वटा सेफ (सुरक्षित बाकस) फेला पारेको छ।

नेपाली सेनाका अनुसार सोमबार टिमुरे क्षेत्रमा खोज तथा उद्धार अभियान सञ्चालन गर्ने क्रममा ती सेफहरू फेला परेका हुन्। फेला परेका पाँच सेफमध्ये तीन वटामा नेपाली र दुई वटामा चिनियाँ भाषामा विवरण लेखिएको छ।

सेनाले फेला परेका सबै पाँच वटा सेफ भरपाईसहित सशस्त्र प्रहरीलाई बुझाएको जनाएको छ।

धादिङमा सेफ फोडेर पैसा बाँड्ने २१ पक्राउ

यसअघि बाढीले बगाएर धादिङमा पुगेको अवस्थामा एउटा बैंकको सेफ फेला परेको थियो। उक्त सेफ फोडेर त्यसमा रहेको रकम आपसमा बाँडेको आरोपमा प्रहरीले २१ जनालाई पक्राउ गरेको थियो।

प्रहरीका अनुसार पक्राउ परेकाहरूको साथबाट ९२ लाख रुपैयाँ समेत बरामद गरिएको थियो।

रसुवा र आसपासका क्षेत्रमा आएको विनाशकारी बाढीका कारण बैंक तथा वित्तीय संस्थाका सामग्रीसहित विभिन्न संरचना बगाएर अन्यत्र पुगेका छन्। बाढीपछि सुरक्षाकर्मीले उद्धारसँगै बाढीले बगाएर ल्याएका सामग्री तथा महत्वपूर्ण वस्तुहरू फेला पार्ने र सम्बन्धित निकायलाई बुझाउने कामसमेत गरिरहेका छन्।

Originally published on abcnews.com.np.