काठमाडौँ, २४ चैत । नवनियुक्त कानुन, न्याय तथा संसदीय मामिलामन्त्री गोविन्द बन्दीले आज पद तथा गोपनियताको सपथ ग्रहण गर्नुभएको छ ।

राष्ट्रपति बिद्यादेवी भण्डारीले राष्ट्रपति कार्यालय शितल निवासमा आयोजित बिशेष समारोहमा बन्दीलाई पद तथा गोपनियताको सपथग्रहण गराउनु भएको हो । नवनियुक्त मन्त्री बन्दीको सपथ ग्रहण कार्यक्रममा उपराष्ट्रपति नन्दबहादुर पुन, प्रधानमन्त्री शेरबहादुर देउवा लगायतको उपस्थिति रहेको थियो । उहाँको नाम गोविन्द प्रसाद शर्मा कोइराला भएपनि गोबिन्द बन्दी लेख्दै आउनु भएको छ । बन्दीलाई बिहिबार बिहान प्रधानमन्त्री देउवाले कानुन मन्त्रीमा नियुक्तिका लागि राष्ट्रपति भण्डारी समक्ष सिफारिस गर्नुभएको थियो । बन्दी एकपा एकीकृत समाजवादीका अध्यक्ष माधव कुमार निकट मानिनु हुन्छ । नवनियुक्त कानुनमन्त्री बन्दी सांसद भने होइन । उहाँ गैर सांसद भएपनि मन्त्री बन्नु भएको हो ।

प्रधानमन्त्रीको सिफारिसमा गैर सांसदलाई पनि राष्ट्रपतिले मन्त्री नियुक्त गर्न सक्ने संविधानको धारा ७८ मा उल्लेख छ । तर त्यसरी नियुक्त भएको मन्त्रीले सपथ लिएको ६ महिनाभित्र संघीय संसदको सदस्यता लिनुपर्छ । अन्यथा मन्त्री पद स्वत खारेज हुन्छ । यसैबीच हाल कानुन मन्त्रालयको जिम्मेवारी सम्हाल्दै आउनु भएका दिलेन्द्र प्रसाद बडूको मन्त्रालय परिवर्तन भएको छ । उहाँलाई उद्योग बाणिज्य तथा आपूर्ति मन्त्रालयको जिम्मेवारी दिइएको छ । यस अघि सो मन्त्रालय प्रधानमन्त्री देउवाले नै सम्हाल्दै आउनु भएको थियो ।