काठमाडौँ, १० बैशाख । महानगरपालिकाका मेयर र उपमेयर पदका उम्मेदवार छान्न नेपाली कांग्रेसलाई सकस परेको छ ।
कांग्रेसका शीर्ष नेताहरू उम्मेदवारको टुंगो लगाउन शुक्रबारदेखि घनिभूत छलफलमा जुटे पनि सहमति बन्न सकेको छैन । आ-आफूले प्रस्ताव गरेका उम्मेदवारमा अडान नछोडेपछि साझा उम्मेदवारको टुंगो लाग्न नसकेको हो ।

महानगर र उपमहानगरका उम्मेदवार छान्न कांग्रेसका शीर्ष नेताहरूको बैठक प्रधानमन्त्रीको सरकारी निवास बालुवाटारमा जारी छ । कहाँ कसलाई उम्मेदवार बनाउने भन्ने छलफल टुंगिएको छैन । सभापति एवम् प्रधानमन्त्री शेरबहादुर देउवाले नेताहरूसँग अलग-अलग छलफल गरिरहनुभएको छ । शीर्ष नेताहरूबीचमै उम्मेदवारीबारे समझदारी नभएपछि शनिबारका लागि बोलाइएको केन्द्रीय कार्यसम्पादन समितिको बैठक समेत स्थगित भएको छ ।

नेताहरूबीच अहिलेसम्म काठमाडौंको मेयरमा सिर्जना सिंह र भरतपुरको उपमेयरमा चित्रसेन अधिकारीलाई उम्मेदवार बनाउने सहमति बनेको छ । त्यसबाहेक ललितपुर, विराटनगरको मेयर, वीरगञ्ज र पोखराको उपमेयर पदको उम्मेदवार टुंगिएको छैन । उम्मेदवारको टुंगो लगाएपछि ती नाम कार्यसम्पादन समितिमा अनुमोदनका लागि प्रस्तुत गर्ने सभापति देउवाको तयारी छ । सहमतिको खोजीमा शुक्रबार रातिसम्म बालुवाटारमा छलफल भएको थियो ।