काठमाडौँ, २२ बैशाख । नेकपा एमालेका अध्यक्ष केपी शर्मा ओलीले अरु पार्टीको चुनावी अभियान देउसी जस्तै भएको टिप्पणी गर्नुभएको छ । बिहीबार कञ्चनपुरको बेलौरीमा आयोजित चुनावी सभालाई सम्बोधन गर्दै उहाँले अरुका सभा घरदैलो देउसी जस्तै देखिएकाले एमालेले ससाना कार्यक्रम गर्न नहुने बताउनुभयो ।
अध्यक्ष ओलीले एमालेको शक्ति देखेर दलहरु एक्लै लड्न डराएको भन्दै गठबन्धन गरेर पनि एमालेसँग सकिँदैन कि भनेर अन्य दल झस्कने गरेको जिकिर गर्नुभयो । गठबन्धनको घोषणा पत्रप्रति कटाक्ष गर्दै उहाँले एमालेलाई गाली बाहेक अरु केही उल्लेख नगरेको आरोप लगाउनुभयो । अध्यक्ष ओलीले एमालेलाई टर्च लगाएर खोज्नु पर्छ भन्नेहरुलाई बैशाख ३० गतेपछि कसलाई कसले टर्च बालेर खोज्नुपर्छ देखाउँछौ भन्नुभयो । यसैबीच कैलालीमा आयोजित चुनावी सभालाई सम्बोधन गर्दै अध्यक्ष ओलीले रेशम चौधरीलाई मुद्दा लगाउनुपर्ने कुनै कारण नै नभएको दाबी गर्नुभयो ।

घटना हुँदा कैलालीमा नरहेका चौधरीलाई मुद्दा लगाइएको उहाँले बताउनुभयो । आफू प्रधानमन्त्री हुँदा थारू समुदायका नेतासँग छ बुँदे सहमति गरेर समस्या समाधान गर्न खोजेको अध्यक्ष ओलीले बताउनुभयो । आफू नेतृत्वको सरकार र गृहमन्त्रीले नै थारू समुदायले उठाएका माग सम्बोधन गर्न पहल गरेको पनि उल्लेख गर्नुभयो ।