काठमाडौँ, २७ बैशाख । काठमाण्डौ उपत्यकाका तीन वटै जिल्ला प्रशासन कार्यालयले आउँदो पालिकाको चुनावलाई ध्यान दिँदै जाँड-रक्सी बिक्री, वितरण र खान निषेध गरेका छन् । उपत्यकाका तीन वटै जिल्ला प्रशासन कार्यालयले आज राति १२ बजेदेखि मतदान सम्पन्न नहुञ्जेलसम्म जाँड-रक्सी बिक्री, वितरण र खान निषेध गरेका हुन् । जिल्लाका ६ वटै पालिकाका सुरक्षा निकायले पनि जाँड-रक्सी बिक्री वितरण र खानलाई कडाइ गर्न सबै पालिकाका मातहतका प्रहरी कार्यालयलाई निर्देशन दिएको छ । जाँडरक्सी बिक्री गरेको, खाएको पाइए कारबाही गरिने जनाइएको छ ।

चुनावको समयमा समयमा जाँड-रक्सी खानेक्रम बढ्न सक्ने र यसले शान्ति सुरक्षामा असर पार्न सक्ने भएकाले रोक लगाइएको ललितपुरका प्रमुख जिल्ला अधिकारी घनश्याम उपाध्यायले जानकारी दिनुभयो ।
यस्तै गृह मन्त्रालयले सबै जिल्ला प्रशासन कार्यालयलाई आज राति १२ बजेदेखि चुनाव सम्पन्न नहुञ्जेलसम्म जाँड-रक्सी बिक्री वितरण र सेवन गर्न नदिन भन्दै परिपत्र गरेको छ ।