काठमाडौँ, ३० जेठ । नेकपा एमालेका नेता भीम रावलले अमेरिकाले पैसा दियो भनेर नेपाल उसको सैन्य गठबन्धनमा सामेल हुन खोजेको आरोप लगाउनुभएको छ ।

सोमबार भएको अन्तर्राष्ट्रिय सम्बन्ध समितिको बैठकमा उहाँले यस्तो बताउनुभएको छ। उहाँले निर्दलीय पञ्चायतमा समेत नेपालले तटस्थता कायम गरेको बताउदै अहिले अमेरिकाले पैसा दियो भनेर सैन्य गठबन्धनमा सामेल हुन खोजेको उल्लेख गर्नुभयो। आर्थिक सहयोगका नाममा कसैले पनि कुनै देशलाई सामरिक रुपमा धकेल्न नहुने भन्दै उहाँले प्रधानमन्त्रीको अमेरिकी भ्रमणका विषयमा बुझ्न संसदीय समितिमा बोलाउन समेत माग गर्नुभयो ।

एमालेकै अर्का सांसद नारदमुनि रानाले विगतमा राजाको हातमा सत्ता बुझाएको इतिहास रहेको भन्दै अहिले शासन सत्ता सेनालाई बुझाउन खोजिएको हो भन्ने प्रश्न गर्नुभयो । उहाँले प्रधानमन्त्री पत्नी आरजु राणा भारत जानु र अमेरिकी सेनाको एशिया प्यासिफिक कमाण्डका प्रमुख जेनरल चाल्र्स ए फ्लिन नेपाल आउनु संयोग मात्र हो कि के हो भनेर प्रश्न समेत गर्नुभएको छ । मुलुकको परराष्ट्र नीति र गतिविधि हेर्दा सरकार स्वयंले संविधानको पालना नगरेको भन्दै उहाँले युक्रेनका विषयमा बोलेर नेपालले ठिक नगरेको पनि बताउनुभयो । अर्का एमाले सांसद मोहन बानियाँले नेपालमा पाँच हजार अमेरिकी सेना गुप्त रुपमा बसेको दावी गर्नुभएको छ। उहाँले ५५ अर्बको लोभमा एमसीसी भित्र्याएर मुलुकलाई ध्वस्त पार्न खोजिएको आरोप लगाउनुभयो । परराष्ट्र नीति सम्बन्धमा गरिएको अन्तर्राष्ट्रिय सम्बन्ध समितिको बैठकमा परराष्ट्रमन्त्री नारायण खड्का भने उपस्थित हुनु भएन् ।

बजेटमाथि उठेका जवाफ दिनुपर्ने भएकाले उपस्थित हुन असमर्थ रहेको जानकारी मन्त्री खड्काले गराएको सभापति पवित्रा निरौला खरेलले जानकारी गराउनुभएको हो ।