काठमाडौं, भदौ १४ गते । भोटेकोसीको बाढीले पुरिएपछि उद्धार कार्य जारी रहेको माथिल्लो त्रिशूली–३ ‘ए’ जलविद्युत् आयोजनाको टनेलबाट पम्पिङ गरेर पानी बाहिर निकाल्ने तयारी गरिएको छ।

भदौ १० गते आएको बाढीपछि ६० मेगावाट क्षमताको आयोजनाको टनेलमा ४२ जना फसेको अनुमान गरिएको छ। उनीहरूको खोज तथा उद्धारका लागि उद्धार टोलीले हिजो रातभर पनि निरन्तर काम गरेको थियो।

केवल टनेलको पोर्टल सफा गर्ने क्रममा आज बिहान करिब ३ बजे विस्फोट गराएर टनेलको मुख खोलिएको थियो। त्यसपछि टनेलभित्र पानी भरिएको पाइएको थियो। अहिले वाटर पम्पसेट प्रयोग गरी पानी बाहिर निकाल्न थालिएको छ।

पानी निकाल्ने कामलाई थप प्रभावकारी बनाउन ठूलो क्षमताको डिजेल जेनेरेटर (डीजी) सेट, थप पम्पसेटलगायत आवश्यक उपकरणसमेत घटनास्थलमा पुर्‍याइएको छ। टनेलको मुखमा थुप्रिएका ढुंगा, माटो तथा गेग्रान हटाएर भित्र प्रवेश गर्न सकिने मार्ग तयार गर्ने काम भइरहेको उद्धारकर्ताले बताएका छन्।

उद्धार कार्यलाई थप प्रभावकारी बनाउन आवश्यक सबै संयन्त्र परिचालन गर्न ऊर्जा, जलस्रोत तथा सिँचाइमन्त्री विराजभक्त श्रेष्ठ, नेपाल विद्युत् प्राधिकरणका सञ्चालक सुनिलकुमार ढुंगेल, कार्यकारी निर्देशकसहितको टोली उद्धारस्थलतर्फ जाँदैछ।

त्यहाँ प्राधिकरणका उपकार्यकारी निर्देशकसहित भूगर्भविद्लगायत विज्ञ टोलीसमेत पुगेको छ। विज्ञ टोलीले टनेलभित्र फसेकाहरूको उद्धारका लागि अपनाउन सकिने अन्य विकल्पबारे अध्ययन गरिरहेको ऊर्जा मन्त्रालयले जनाएको छ।

Originally published on abcnews.com.np.