काठमाडौं । नेपाली राष्ट्रिय क्रिकेट टोलीले एसीसी मेन्स प्रिमियर कपमा विजयी सुरुवात गरेको छ। सोमबार मलेसियाको बाङ्गीस्थित वाईएसडी–यूकेएम क्रिकेट ओभलमा भएको खेलमा नेपालले बहराइनलाई ७ विकेटले पराजित गरेको हो।  बहराइनले दिएको ८८ रनको लक्ष्य नेपालले २१ ओभरमै ३ विकेट गुमाएर पूरा गर्‍यो। नेपालका लागि अर्जुन कुमाल ३६ रनमा अविजित रहे। उनले ५८ बलमा ५ चौका प्रहार गरे। रोहित पौडेल १९ रनमा नटआउट रहे। उनले १४ बलमा १ चौका र १ छक्का प्रहार गरे। आसिफ शेखले २५ बलमा २ चौका र १ छक्कासहित १८ रन बनाए। देव खनाल १० रनमा आउट भए भने इशान पाण्डे १ रनमा रनआउट भए। यसअघि टस जितेर नेपालले फिल्डिङ रोजेपछि ब्याटिङ गरेको बहराइन ३६.२ ओभरमा ८७ रनमै अलआउट भएको थियो।  नेपालका कप्तान सन्दीप लामिछानेले घातक बलिङ गर्दै १० ओभरमा १४ रन खर्चेर ५ विकेट लिए। उनले चार ओभर मेडन राखे। ललित राजवंशीले ३ तथा करण केसीले २ विकेट लिए।  बहराइनका लागि फियाज अहमदले सर्वाधिक १५ रन बनाए। मुहम्मद वासिमले १३ तथा अली दाउदले १० रन जोडे। यस जितसँगै नेपालले प्रतियोगितामा महत्वपूर्ण दुई अंक जोडेको छ। नेपालका कप्तानका रूपमा सन्दीप लामिछानेले पुनरागमन गरेको पहिलो खेलमै पाँच विकेट लिएर प्रभावशाली प्रदर्शन गरेका छन्।  नेपालले समूह चरणको दोस्रो खेल बिहीबार मलेसियासँग खेल्नेछ। त्यसपछि आइतबार साउदी अरेबिया र मंगलबार हङकङसँग प्रतिस्पर्धा गर्ने तालिका छ।

Originally published on abcnews.com.np.