काठमाडौं, ४ माघ । फ्रेन्च लिग वान फुटबल अन्तर्गत गएराति भएको खेलमा लिग लिडर पेरिस सेन्ट–जर्मेन (पिएसजी) ले शानदार जित दर्ता गरेको छ ।

स्टार खेलाडी नेइमारको चार गोलको मद्दतमा पिएसजीले डिजोनलाई ८–० ले हराएको हो । पिएसजीका लागि एन्जल डी मारियाले दुई तथा एडिसन काभानी र केलियन एमबाप्पेले एक एक गोल गरे ।

घरेलु मैदानमा भएको खेलमा डी मारियाले चौथो र १५ औं मिनेटमा गोल गर्दै पिएसजीलाई सुरुवाति अग्रता दिलाए । २१ औँ मिनेटमा काभनीले गोल गरेपछि पिएसजीको अग्रता ३–० मा पुग्यो । काभानीले पिएसजीको सर्वकालीन सर्वा्धिक गोलकर्ताको कीर्तिमानमा बराबरी गरेका छन् । उनले पिएसजीका लागि सबै प्रतियोगितामा गरेर अहिलेसम्म एक सय ५६ गोल गरेका छन् ।

यो सन् २०१२ देखि २०१६ सम्म पिएसजीमा रहेर जाल्टन इब्राहिमोविचले बनाएको कीर्तिमानसंगको बराबरी हो । ४२ औं मिनेटमा नेइमारले व्यक्तिगत पहिलो गोल गरेपछि पिएसजीले पहिलो हाफमा ४–० को अग्रता लियो ।

नेइमारले दोस्रो हाफमा थप तीन गोल गरे । उनले ५७ र ७३ औं मिनेटमा गोल गर्दै ह्याट्रिक पूरा गरे । ७७ औं मिनेटमा एमबाप्पेले गोल गरेपछि पिएसजीको अग्रता ७–० मा पुग्यो । ह्याट्रिक गरिसकेका नेइमारले ८३ औँ मिनेटमा पाएको पेनाल्टीको अवसरमा पनि गोल गर्दै पिएसजीलाई ८–० को जित दिलाए । नेइमारले पेनाल्टी प्रहार गरेपछि काभानी भने यहि खेलमा थप एक गोल गरेर क्लबको सर्वाकालीन सर्वाधिक गोलकर्ता बन्ने अवसरबाट वञ्चित भए ।

विजयी भएको पिएसजीको २१ खेलबाट ५६ अंक भएको छ । राति नै भएको खेलमा गुइन्गाम्पलाई २–० ले हराएको लियोन दोस्रो स्थानमा उक्लिएको छ र पिएसजी लियोन भन्दा ११ अंकले अघि रहेको छ ।