काठमाडौं, २८ असार । भारतको मध्य प्रदेशस्थित मोरेना जिल्लाको अस्पतालले बालकलाई मृत घोषणा गरेपछि अस्पतालले शव लैजान एम्बुलेन्स उपलब्ध नगराएको भारत संन्चार माध्यम टाइम्स अफ इण्डियाले जनाएको छ । एम्बुलेन्स उपलब्ध नगराएपछि शव गाउसम्म पु¥याउने गाडीको खोजीमा बुबा भौतारिरहँदा ८ वर्षीय बालकले दुई वर्षीय मृत भाइ रुङिरहेको एक ह्रृदयविदारक भिडियोले यतिखेर सामाजिक सञ्जालमा सबैको ध्यान तानेको छ । मृत बालकको परिवारको आर्थिक अवस्था मजबुत थिएन । रोगका कारण जिल्ला अस्पतालमा बालकको मृत्यु भएको हो ।

बुबाले एम्बुलेन्स मागे पनि जिल्ला अस्पतालका कर्मचारीले गाडी नपाएको भन्दै एम्बुलेन्सको व्यवस्थापन गर्न मानेनन् । सडकमा बालक शवलाई रुङेर बसेको देखेपछि बाटोमा हिड्ने बटुवाको ध्यान तानेको थियो । केही समयपश्चात् प्रहरी र केही सञ्चारकर्मी उक्त स्थानमा आएपछि प्रहरीले बालकको शव घर लैजान एम्बुलेन्सको व्यवस्था गरेको टाइम्स अफ इण्डियाले जनाएको छ ।