काठमाडौँ । आगामी संघ र प्रदेशसभाको निर्वाचनका लागि उम्मेदवार मनोनयनको औपचारिक पत्र पठाउने जिम्मा सभापति शेरबहादुर देउवाले पाएका छन् ।

नेपाली कांग्रेसले पार्टी केन्द्रीय कार्यालय सानेपामा शनिबार बसेको केन्द्रीय कार्य सम्पादन समितिको बैठकले दुवै तहका प्रत्यक्ष र समानुपातिक उम्मेदवारको मनोनयनको पत्र पठाउने जिम्मा देउवालाई दिने निर्णय गरेको हो ।

आवश्यक प्रक्रिया पुर्‍याएर पार्टीका सम्बन्धित निकायले नाम प्रस्ताव गर्न निर्देशन गर्ने र औपचारिक पत्र सभापति देउवाले पठाउने भएको हो । उम्मेदवारको नाम प्रस्ताव गर्ने समय भने बैठकले तोकेको छैन ।

यसैगरी बैठकले निर्वाचनका लागि दल दर्ताको जिम्मा कार्यालयका मुख्यसचिव कृष्णप्रसाद पौडेललाई दिएको छ । बैठकपछि सहमहामन्त्री भिष्मराज आङ्दम्बेले भने, ‘२०७९ मंसिर ४ गते हुने प्रतिनिधिसभा सदस्य र प्रदेशसभा सदस्यको निर्वाचन प्रयोजनका लागि नेपालको संविधानको धारा २७१ तथा राजनीतिक दल सम्बन्धी ऐन, २०७३ को दफा ४८ बमोजिम निर्वाचन आयोगमा दल दर्ता गर्ने र सोसम्बन्धी सम्पूर्ण प्रक्रिया पूरा गर्न नेपाली कांग्रेस केन्द्रीय कार्यालयका मुख्य सचिव कृष्णप्रसाद पौडेललाई जिम्मेवारी प्रदान गरिनेछ ।’

कांग्रेसले आगामी भदौ १० गतेदेखि २४ गतेसम्म निर्वाचन केन्द्रित राष्ट्रव्यापी अभियान पनि गर्नेभएको छ ।