काठमाडौं, ७ माघ । इंग्लिस प्रिमियर लिग फुटबल अन्तर्गत गएराति भएको खेलमा म्यानचेस्टर युनाइटेडले महत्वपूर्ण जित निकालेको छ ।

अवे मैदानमा भएको खेलमा जोसे मोरिन्होको टिम म्याचेस्टर युनाइटेडले बर्नलीलाई १–० ले हराएको हो । पहिलो हाफमा गोलरहित बराबरी भएको खेलमा दोस्रो हाफमा एन्थोनी मार्शलले युनाइटेडका लागि विजयी गोल गरे ।

५४ औं मिनेटमा मार्शलले गरेको गोल नै युनाइटेडको जितमा निर्णायक बन्यो । युनाइटेडले अर्को एक पटक पनि गोल गर्ने राम्रो प्रयास गरेको थियो तर त्यसमा सफल भने हुन सकेन । मार्शलले यो सिजन ११ गोल गरिसकेका छन् ।

जितपछि दोस्रो स्थानको म्यानचेस्टर युनाइटेडको २४ खेलबाट ५३ अंक भएको छ । तर उ शीर्ष स्थानको म्यानचेस्टर सिटी भन्दा १२ अंकले पछि रहेको छ ।

त्यसअघि शनिबार बेलुका भएको खेलमा ब्राइटनलाई ४–० ले हराएको चेल्सी ५० अंकसहित तेस्रो स्थानमा छ । चेल्सीको जितमा इडन हजार्डले दुई तथा विलियन र मोसिसले एक एक गोल गरे ।