काठमाडौं, ९ माघ । अख्तियार दुरुपयोग अनुसन्धान आयोगले नेपाल आयल निगमको जग्गा खरिद प्रकरणको अनुसन्धान अन्तिम चरणमा पुर्रयाएको छ । नेपाल आयल निगमले इन्धन भण्डारणको लागि भन्दै देशका विभिन्न भागमा खरिद गरेको जग्गामा अनियमितता भएको पाईएपछि अनुसन्धान अघि बढेको थियो ।

सोही अनियमिततामाथि भएको अनुसन्धानमा अख्तियार दुरुपयोग अनुसन्धान आयोगले प्रकरणसंग जोडिएका करिब ३ सय जनाको बयान लिईसकेको छ । अख्तियार स्रोतका अनुसार जग्गा खरिद प्रकरणमा मुछिएका जग्गाधनी, बिचौलिया, टेन्डरदाता, तत्कालीन स्थानीय निकायका प्रतिनिधिसँगको वयान सकिएको छ ।

त्यसैगरी आयल निगमका १६ जना कर्मचारीसँग पनि बयान लिइएको छ । आयल निगमका प्रवक्ता वीरेन्द्र गोइतले अख्तियारले बयानका लागि बोलाएको बताएका छन् । त्यसैगरी आयल निगमका कार्यकारी निर्देशक गोपाल खड्कालाई आयोगले मंगलबार बयानका लागि बोलाएको छ ।

गोपाल खड्काको पनि आज लियो बयान

अख्तियार दुरुपयोग अनुसन्धान आयोगले मंगलवारदेखि आयल निगमका कार्यकारी निर्देशक गोपाल खड्काको बयान लिन शुरु गरेको छ । खड्काकै संलग्नतामा जग्गा खरिदमा करिब १ अर्ब रुपैयाँ बराबरको घोटाला भएको आरोप लाग्दै आएको छ ।
खड्का बयान दिन मंगलवार बिहान १० बजे नै अख्तियार दुरुपयोग अनुसन्धान आयोगको टंगालस्थित कार्यालयमा उपस्थित भएका थिए ।
खड्काको बयान सकिएपछि आयल निगमको सञ्चालक समितिका पदाधिकारी तथा सदस्यहरुसँग बयान लिइने अख्तियार स्रोतले जनाएको छ ।

जग्गा खरिदमा १ अर्बभन्दा बढी अनियमितता

तत्कालीन व्यवस्थापिका संसदको उद्योग वाणिज्य तथा उपभोक्ता हित संरक्षण समितिले प्रतिवेदन सार्वजनिक गर्दै निगमले झापा, सर्लाही, चितवन र रुपन्देहीको भैरहवामा खरिद गरेको जग्गामा एक अर्ब रुपैयाँभन्दा बढी अनियमितता भएको बताएको थियो । जग्गाको जायज मूल्यभन्दा चार गुणा बढी मूल्य तिरेर १ अर्ब रुपैयाँभन्दा बढी अनियमितता भएको संसदीय समितिको ठहर थियो ।
अख्तियार दुरुपयोग अनुसन्धान आयोगले पनि आफ्नो अनुसन्धानबाट उक्त प्रकरणमा १ अर्ब भन्दा बढी अनियमितता भएको तथ्य फेला पारेको छ ।

अनुसन्धान अन्तिम चरणमा

नेपाल आयल निगम घोटाला प्रकरण अनुसन्धान अन्तिम चरणमा पुगेको छ । निगमका कार्यकारी निर्देशक गोपाल खड्का र सञ्चालक समितिका सदस्य तथा पदाधिकारीसँग बयान लिने काम मात्रै बाँकी रहेको छ ।
त्यसपछि मुद्धामा दोषी पाईएका उपर विशेष अदालतमा मुद्दा दायर गरिने छ ।