काठमाडौं ६ पुस । प्रधानमन्त्री शेरबहादुर देउवासमक्ष माओवादीको तर्फबाट सत्तारुढ गठबन्धन कायम राख्ने हो भने माओवादी अध्यक्ष पुष्पमकल दाहाल प्रचण्डको नेतृत्वमा सरकार बनाउनु पर्ने प्रस्ताव गरिएको छ । कांग्रेसको दल नेता निर्वाचित भए लगत्तै अर्थमन्त्री जनार्दन शर्माले देउवालाई प्रम निवास बालुवाटार पुगेर नयां ससरकार बारे प्रस्ताव गरेका हुन् ।

५ दलीय सत्तारुढ गठबन्धनलाई कायम गर्दै याँ सरकार बनाउनुपर्ने अर्थमन्त्री शर्माले प्रधानमन्त्री देउवालाई प्रस्ताव गरेका छन् । त्यसका लागि शर्माले माओवादी अध्यक्ष पुष्पकमल दाहाल प्रचण्डलाई पहिले सरकारको नेतृत्व दिनुपर्ने आग्रह गरे।

आलोपालो गर्ने विषयमा तपाइँ र हाम्रोबीच राम्रो अन्डरस्ट्यानिङ छ। तपाइँले यस अघि नै पहिलो कार्यकाल प्रधानमन्त्री बन्नुभयो। अब माओवादीलाई नेतृत्व हस्तान्तरण गर्नुस् । त्यसपछि फेरि तपाइँको पालो त छँदैछ भन्दै माओवादी उपमहासचिव रहेका अर्थमन्त्री शर्माले प्रचण्डप्रस्ताव देउवालाई सुनाएका हुन् ।
संसदको दोस्रो ठूलो दल नेकपा एमालेले औपचारिकरूपमै प्रधानमन्त्रीको प्रस्ताव गरेपछि प्रचण्डले दूतका रूपमा शर्मालाई बालुवाटार पठाएका हुन्।

एमाले उपाध्यक्ष सुवास नेम्वाङले मंगलबार प्रचण्ड निवास खुमलटार पुगेर प्रचण्डलाई प्रधानमन्त्री बनेर वाम गठबन्धनको सरकार बनाउन प्रस्ताव गरेका थिए। कांग्रेसको बटमलाई प्रचण्डलाई छिटो चाहिएको माओवादीका एक पदाधिकारीले बताए । कांग्रेसले नेतृत्व हस्तान्तर गनं आनाकानी गरेमा वाम गठबन्धनको सरकार बनाउन बाटो खुल्ने माओवादीको बुझाई छ । यस अघि राप्रपाका अध्यक्ष राजेन्द्र लिंगदेन र घण्टीका अध्यक्ष रवि लामिछानेले प्रचण्ड र अ‍ोलीलाई भेटेर दुई दल मिलेर गठबन्धन गरेमा त्यो गठबन्धनमा आफूहरु सामेल हुन तयार रहेको बताइसकेका छन्। उता जसपाका अध्यक्ष उपेन्द्र यादवको चाहाना पनि वाम गठबन्धनकै सरकार बन्नु पर्ने रहेको छ ।