काठमाडौं । त्रिभुवन अन्तर्राष्ट्रिय विमानस्थलबाट भन्सार छली गरेर ल्याइएको करिब ७२ लाख २५ हजार रुपैयाँ बराबरको सामान बरामद गरिएको छ। घटनामा संलग्न रहेको आरोपमा चीनबाट आएका एक चिनियाँ नागरिकलाई प्रहरीले पक्राउ गरेको छ।

विमानस्थल सुरक्षा कार्यालयका अनुसार चाइना इस्टर्न एयरलाइन्सको उडानमार्फत नेपाल आएका झुसन नामक चिनियाँ नागरिकको साथबाट बिलबिजकबिनाका विभिन्न इलेक्ट्रोनिक सामग्री तथा सुर्तीजन्य पदार्थ बरामद गरिएको हो।

अन्तर्राष्ट्रिय आगमनतर्फको भन्सार क्षेत्र पार गरी बाहिरिने क्रममा शंका लागेपछि प्रहरीले उनलाई रोकेर जाँच गरेको थियो। जाँचका क्रममा ठूलो परिमाणमा घोषणा नगरिएका तथा बिलबिजक नभएका सामान फेला परेपछि उनलाई नियन्त्रणमा लिइएको विमानस्थल सुरक्षा कार्यालयले जनाएको छ।

विमानस्थल सुरक्षा कार्यालयका प्रहरी उपरीक्षक राजकुमार सिलवालका अनुसार बरामद गरिएको सामानको अनुमानित मूल्य ७२ लाख २५ हजार रुपैयाँ रहेको छ।

मोबाइलदेखि ल्यापटपका पार्टपुर्जासम्म

बरामद गरिएका सामग्रीमा मोबाइल फोन, ल्यापटप, ल्यापटपका विभिन्न पार्टपुर्जा, डिस्प्ले, कभरलगायतका इलेक्ट्रोनिक सामग्री रहेका छन्। साथै सुर्तीजन्य पदार्थसमेत फेला परेको प्रहरीले जनाएको छ।

प्रहरीका अनुसार ती सामग्री आवश्यक बिलबिजक तथा भन्सार प्रक्रिया पूरा नगरी नेपाल भित्र्याइएको आशंका गरिएको छ। पक्राउ परेका चिनियाँ नागरिकमाथि आवश्यक कानुनी प्रक्रिया अघि बढाइएको छ।

Originally published on abcnews.com.np.