काठमाडौं, १३ पुस।  केन्द्रसंगै प्रदेशहरुमा पनि नयाँ गठबन्धनकै सरकार बन्ने देखिएको छ । केन्द्रको गठबन्धनमा रहेका दल एक ठाउमा उभिदा प्रदेशमा पनि एमाले गठबन्धनमै सामेल भएर सरकार बन्ने निश्चित देखिएको छ । प्रतिनिधिसभाको सबैभन्दा ठूलो दल नेपाली कांग्रेससहित नेकपा एकीकृत समाजवादी पार्टी, लोकतान्त्रिक समाजवादी पार्टी, राष्ट्रिय जनमोर्चा र नेपाल मजदुर किसान पार्टीबाहेक सबै दलले गठबन्धन गरेर केन्द्र र सातै प्रदेशमा सरकार बनाउने सक्ने छन् ।

एमाले नेतृत्वको नया गठबन्धनले केन्द्रसहित सातवटै प्रदेशमा सरकार गठनका लागि आवश्यक बहुमत पुग्ने देखिएको छ । नेपाली कांग्रेस नेतृत्वको गठबन्धन टुटेसगै प्रतिनिधिसभाको दोस्रो ठूलो दल नेकपा एमाले नेतृत्वमा नया गठबन्धन बनेको छ । त्यही गठबन्धनबाट आइतबार माओवादी अध्यक्ष पुष्पकमल दाहाल प्रचण्ड प्रधानमन्त्रीमा नियुक्त भएका छन् ।

नया समीकरणका कारण मुलुकका मुख्य ३५ वटा पदमा संसद्को सबैभन्दा ठूलो दल कांग्रेस वञ्चित हुने देखिएको छ । राजनीतिक नियुक्ति हुने ती पदमा एमाले नेतृत्वको गठबन्धनबीच भागबन्डा हुनेछ । केन्द्रमा मन्त्रिपरिषद् विस्तारसगै प्रदेशहरुमा सरकार गठनको प्रक्रिया पनि सुरु हुनेछ । यस सगसगै अब सातवटा प्रदेशमा मुख्यमन्त्रीहरूको नियुक्ति हुनेछ । केन्द्रमा एमाले, माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, जनमत पार्टी, नागरिक उन्मुक्ति पार्टी र तीन स्वतन्त्र सांसद समेत गरी १६९ सांसदको नया गठबन्धन बनेको छ । सात वटै प्रदेशमा आइतबार बनेको नया गठबन्धनकै बहुमत रहेकाले मुख्यमन्त्रीको नियुक्ति पनि तिनै दलहरूबीचको समीकरणबाट बन्ने देखिन्छ । नेकपा एमालेका सांसद डा. दिनेशचन्द्र देवकोटाले अबको सत्ता समीकरण रुपान्तरणकारी शक्तिहरु एक ठाउँमा बाधिएकोले यसबाट मुलुकको सम्वृद्धिका लागि मिलेर अघि बढ्नु पर्ने बताएका छन् । उनले नेत्तृत्वहरुले विगतमा गरेका गल्तिहरु सच्याएर अघि बढ्ने अवसरको सुरुवात भएको भन्दै अबको समीकरण मिलेर अगाडी बढ्नुको विकल्प नभएको बताउछन् ।

अधिकारी अहिलेको परिस्थिती अनुसार सरकारले जे निर्णय गर्छ त्यही अनुसार अघि बढ्ने बताउछन् ।सबै प्रदेशमा एमाले नेतृत्वको गठबन्धनको बहुमत छ । प्रदेश १ मा ९३ सांसद रहेकोमा बहुमतका लागि कम्तीमा ४७ सांसदको समर्थन आवश्यक पर्नेमा एमालेका ४०, माओवादी केन्द्रका १३, राप्रपाका ६ र जसपाका १ सांसद छन् । यस्तै १०७ सदस्यीय मधेस प्रदेशमा बहुमतका लागि कम्तीमा ५४ सांसद आवश्यक हुन्छ । मधेसमा एमालेका २३, जनमत पार्टीका १३, जसपाका १६, माओवादी केन्द्रका ८, राप्रपाका १ सांसद छन् । बाग्मती प्रदेशमा ११० सांसद रहेकोमा बहुमतका लागि कम्तीमा ५६ सांसद आवश्यक पर्नेमा एमालेका २७, माओवादी केन्द्रका २१ र राप्रपाका १३ सांसद छन् । ६० सदस्यीय गण्डकी प्रदेशमा बहुमतका लागि कम्तीमा ३१ सांसद आवश्यक पर्नेमा एमालेका २२, माओवादी केन्द्रका ८, राप्रपाको २ सांसद छन् । ८७ सदस्यीय लुम्बिनी प्रदेशमा बहुमतका लागि कम्तीमा ४४ सांसद आवश्यक पर्नेमा एमालेका २९, माओवादी केन्द्रका ९, जसपाका ३, राप्रपाका ४, नागरिक उन्मुक्ति पार्टीका ४, जनमत पार्टीको ३ सांसद छन् । कर्णाली प्रदेशमा ४० सांसद छन् । बहुमतका लागि २१ सांसद आवश्यक पर्नेमा एमालेका १०, माओवादी केन्द्रका १३ र राप्रपाका एक सांसद छन् । यस्तै ५३ सदस्यीय सुदूरपश्चिम प्रदेश सभामा बहुमतका लागि कम्तीमा २७ सांसद आवश्यक पर्नेमा एमालेका १०, माओवादी केन्द्रका ११, नागरिक उन्मुक्ति पार्टीका ७ र राप्रपाको एक सांसद छन् । सबै प्रदेशमा एमाले नेतृत्वको गठबन्धनको बहुमत छ । यो हिसाबले सातवटै प्रदेशमासमेत नया“ गठबन्धनको सरकार बन्ने पक्का भएको छ ।