काठमाडौं १४ पुस। सत्ता साझेदार दलका प्रमुखहरुको बैठक सुरु भएको छ ।गठबन्धन प्रमुखहरुको बैठक प्रधानमन्त्री निवास बालुवाटारमा जारी रहेको छ ।
बैठकमा प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्ड, नेकपा एमाले अध्यक्ष केपी शर्मा ओली, उपप्रधानमन्त्री एवं गृहमन्त्री तथा राष्ट्रिय स्वतन्त्र पार्टीका सभापति रवि लामिछाने र राप्रपाका अध्यक्ष राजेन्द्र लिङ्देन सहभागी छन् ।

मन्त्रिपरिषद् विस्तार र शक्ति बाँडफाँट गर्न शीर्ष नेताहरुको बैठक बसेको हो । बैठकमा संघीय सरकारको मन्त्रिपरिषद् विस्तारका साथै प्रदेश सरकार गठनको विषयले पनि प्रवेश पाउनेछ ।

प्रमुख सत्ता साझेदार नेकपा एमालेका अध्यक्ष र प्रधानमन्त्री प्रचण्डबीच बुधबार साढे दुई घण्टा एकल वार्ता भएको थियो । बुधबारको वार्तामा उनीहरुबीच भागबन्डाको न्यूनतम सहमति भएको स्रोतको दाबी छ ।

बैठकमा सबै सत्ता साझेदार दलहरुबीच शक्ति बाँडफाडको सहमति गर्ने बताइएको छ ।

पहिलो चरणमा प्रचण्ड नेतृत्वको सरकारमा ८ सदस्यीय मन्त्रिपरिषद् गठन भएको छ । अब केन्द्रमा मन्त्रिपरिषद्को बैठक विस्तार भन्दा बढी महत्व प्रदेश सरकार गठनको एजेण्डा प्रमुख भएको छ । यसै हप्ताबाट प्रदेश सभाका बैठकहरु बस्ने तयारी भइरहेको छ ।