काठमाडौं २६ पुस । प्रधानमन्त्री पुष्पकमल दाहाल प्रचण्डले आज प्रतिनिधि सभाबाट विश्वासको मत लिने कार्यक्रम रहेको छ ।

७ दलको समर्थनमा गत पुस १० गते नेकपा माओवादी केन्द्रका संसदीय दल नेतासमेत रहेका प्रचण्ड प्रधानमन्त्री नियुक्त भएका थिए।

प्रधानमन्त्री नियुक्त भएको एक महिनाभित्र प्रतिनिधि सभाबाट विश्वासको मत लिनुपर्ने व्यवस्थाअनुसार मंगलबार बिहान ११ बजे बस्ने प्रतिनिधि सभा बैठकबाट प्रधानमन्त्री प्रचण्डले विश्वासको मत लिन लागेका हुन्।

संविधानको धारा ७६ को उपधारा २ अनुसार दुई वा दुईभन्दा बढी दलको समर्थनमा प्रधानमन्त्री नियुक्त हुने व्यवस्थाअनुसार प्रचण्ड प्रधानमन्त्री बनेका थिए।

नेकपा एमाले, माओवादी केन्द्र, राष्ट्रिय स्वतन्त्र पार्टी, राप्रपा, जसपा, जनमत र नागरिक उन्मुक्ति पार्टीले प्रधानमन्त्री बनाउन प्रचण्डलाई समर्थन गरेका थिए।

केही स्वतन्त्र सांसद गरी १६९ सां‌सदको प्रचण्डलाई समर्थन थियो। आज विश्वासको मत लिँदा यो संख्यामा बढ्ने गरी सत्ता साझेदार दलहरूले पहल गरिरहेको एमाले अध्यक्ष केपी शर्मा ओलीले बताएका छन् ।

प्रधानमन्त्री प्रचण्डले संसदको सबैभन्दा ठूलो दल नेपाली कांग्रेसका सभापति शेरबहादुर देउवालाई उनकै निवास धुम्बाराही पुगेर सोमबार साँझ भेटका थिए । प्रचण्ड देउवालाई पनि विश्वासको मत दिन आग्रह गरेका थिए । । देउवाले पार्टीमा छलफल गरेर निर्णय दिने जवाफ दिएका छन्।

प्रचण्डले नेकपा एकीकृत समाजवादीका अध्यक्ष माधवकुमार नेपाललाई पनि पटकपटक भेटेर विश्वासको मत मागेका छन्। तर माधव नेपालले आफ्नो पार्टीले भाउ नपाएको भन्दै अलमल कुरा गरिरहेका छन् । तर बागमतीलगायत प्रदेश सरकारमा एकीकृत समाजवादीले समर्थन गरिसकेको छ।
प्रचण्डले विश्वासको मत पाउने निश्चित छ । विश्वासको मत पाए लगत्तै दुईदिन भित्र क्याविनेटलाई पूर्णता दिने प्रधानमन्त्रीको तयारी रहेको बालुवाटार स्रोतले बताएको छ ।