काठमाडौं, १४ भदौ । त्रिशूली–३ ‘बी’ जलविद्युत् आयोजनास्थलमा उद्धार कार्यलाई तीव्रता दिन नेपाली सेनासहितको प्राविधिक टोली परिचालन गरिएको छ।

आयोजनाका प्रमुख, परामर्शदाता कम्पनीका प्रमुख तथा साइट इन्जिनियरसहित नेपाली सेनाको टोली घटनास्थलमा पुगेर उद्धार कार्य सुरु गरेको हो।

टोलीले आयोजनास्थलको भौगोलिक तथा प्राविधिक अवस्थाको स्थलगत निरीक्षण गरी सम्भावित जोखिमको मूल्याङ्कन गर्दै उद्धार कार्यलाई सुरक्षित रूपमा अघि बढाइरहेको जनाइएको छ। उद्धारमा संलग्न विभिन्न निकायबीच आवश्यक समन्वयसमेत भइरहेको छ।

प्रतिकूल मौसम र चुनौतीपूर्ण भौगोलिक अवस्थाका कारण उद्धार कार्य जटिल बनेको भए पनि सम्भावित जोखिमलाई ध्यानमा राख्दै आवश्यक जनशक्ति, उपकरण तथा स्रोतसाधन परिचालन गरिएको छ।

पछिल्लो तथ्यांकअनुसार त्रिशूली–३ ‘बी’ आयोजनास्थलबाट अझै १२२ जना सम्पर्कविहीन छन्। हालसम्म ९१ जनाको उद्धार गरिएको जनाइएको छ।

Originally published on abcnews.com.np.