काठमाडौं २६पुस । प्रधानमन्त्री पुष्पकमल दाहाल प्रचण्डले २०७७ र २०७८ मा भएको संसद विघटन अब इतिहासको विषय भएको बताएका छन् । उनले भने त्यो विषय अब सरोकारको विषय रहेन ।संसद बैठकमा सांसदहरुले उठाएको जिज्ञासाको जवाफ दिने क्रममा प्रचण्डले संसद विघटनका बारेमा शेरबहादुर देउवा, केपी शर्मा ओली, माधव नेपाल र चित्रबहादुर केसी सम्मले उठाएको सन्दर्भमा टिप्पणी गरेका हुन् ।संसद विघटन सही या गलत थियो भन्ने हाम्रो गठबन्धनको सरोकार होइन, प्रचण्डले भने, हामीले जतिबेला संविधनसभाबाट संविधान बनयौं। त्यसबेला विगतका विघटनका अनुभव पनि ख्याल गरेकै हो।

प्रधानमन्त्रीले आउने दिनमा सदनलाई सर्वोपरि बनाउने कुरामा सहमति नै रहेको पनि बताए। ‘०७२ को संविधान परिमार्जन नहुँदासम्मत त्यसैअनुसार अघि बढ्न तयार छौँ’ उनले भने, संविधानको भावनाभन्दा दायाँबायाँ गर्ने छुट हामीलाई छैन। अहिले हाम्रो सरकारलाई असाधारण समर्थनको अवस्था देखिएको छ। यो हाम्रा लागि चुनौती र अवसर दुवै हो।’ यसरी प्रचण्डले संसद विघटनको बारेमा सत्ता सझेदार दल एमाले अध्यक्ष ओलीले गरेको संसद विघटन सम्वन्धी दलिलका बारे बताएका हुन् ।