लुम्विनी २७ पुस । लुम्बिनी प्रदेश सभामा नेकपा एमाले संसदीय दलका नेता लीला गिरीले बुधबार मुख्यमन्त्री नियुक्त भएका छन् ।
लुम्बिनी प्रदेशका प्रदेश प्रमुख अमिक शेरचनले संविधानको धारा १६८ को उपधारा २ बमोजिमको बहुमतीय सरकार गठनका लागि पुस २७ गते ४ बजेसम्मको समय सीमा तोकेका थिए ।
प्रदेश प्रमुख शेरचनले दिएको अवधि भित्रै दलहरूले मुख्यमन्त्रीका लागि दाबी पेश गरेका हुन्।
गिरीले ७ दलका ५८ सांसदको हस्ताक्षरसहित बुधवार दिउँसो २ बजे मुख्यमन्त्रीको लागि दाबी पेश गरेका थिए ।
लुम्बिनी प्रदेशमा सबैभन्दा धेरै सांसदसहित पहिलो दल बनेको एमालेका २९ जना सांसद छन्। सरकारलाई माओवादी केन्द्रका १०, राप्रपाका ४, जसपा, लोसपा र जनमतका ३, ३ जना सांसदले समर्थन गरेका छन्।

चार जना सांसद रहेको नागरिक उन्मुक्ति पार्टी र माओवादी केन्द्रले सांसदको टिकट नदिएपछि स्वतन्त्र रुपमा उठेर निर्वाचन जितेका २ जना सांसदले पनि वाम गठबन्धनको सरकारलाई समर्थन गरेका छन्।
२७ जना सांसद सहित प्रदेशमा दोस्रो ठूलो दल बनेको नेपाली कांग्रेस र एक, एक जना सांसद रहेका नेकपा एकीकृत समाजवादी र राष्ट्रिय जनमोर्चा भने सरकार बाहिर बसेका छन्।
मुख्यमन्त्रीको शपथ ग्रहण भने बिहीबार दिउँसो १ बजे देउखुरीमा हुने कार्यक्रम तय भएको छ।