विराटनगर २९ पुस । प्रदेश १ सरकारका मुख्यमन्त्री हिक्मतकुमार कार्कीले मन्त्रिपरिषद विस्तार गरेका छन् । मुख्यमन्त्री कार्कीले विश्वासको मत लिनुअघि सरकारमा थप ३ बिनाविभागीय मन्त्री नियुक्त गरेका छन् ।

मन्त्रिपरिषद विस्तारको क्रममा शुक्रबार नेकपा माओवादी केन्द्रबाट २ र एमालेबाट १ जना मन्त्री बनेका हुन् । नेकपा एमालेबाट सोलुखुम्बुका बुद्धिकुमार राजभण्डारी र माओवादी केन्द्रबाट तेह्रथुमका दुर्गा चापाँगाई तथा मोरङका जीवन आचार्य थपिएका छन्  ।

पौष २५ गते मुख्यमन्त्रीसँगै ३ जना मन्त्रीले प्रदेश सरकारको मन्त्रीको रुपमा शपथ लिएका थिए । नेकपा एमालेका तिलकुमार मेन्याङ्बो,राष्ट्रिय प्रजातन्त्र पार्टीका भक्तिप्रसाद सिटौला र जनता समाजवादी पार्टीकी निर्मला लिम्बु मन्त्री बनिसकेका छन् ।
आजको विस्तारसँगै प्रदेश १ सरकारको मन्त्रिपरिषद ७ सदस्यीय बनेको छ ।

मुख्यमन्त्री कार्कीले आज प्रदेश सभामा विश्वासको मत लिने तयारीमा छन् । विश्वासको मत लिने प्रयोजनका लागि आज दिउँसो १ बजेका लागि प्रदेशसभा बैठक बोलाइएको छ । आइतबार ६० सांसदको समर्थनमा मुख्यमन्त्री नियुक्त भएका कार्कीले कम्तिमा ४७ सांसद मत पाउनुपर्छ ।

९३ सदस्यीय प्रदेश सभामा नेकपा एमालेका ४०, नेकपा माओवादी केन्द्रको १३, राप्रपाको ६ र जसपाको १ सहित मुख्यमन्त्री कार्कीलाई समर्थन गर्नेको संख्या ६० छ।

प्रतिपक्षमा नेपाली कांग्रेसका २९ र नेकपा एकीकृत समाजवादीका ४ सांसद छन्।
विश्वासको मत पाइसकेपछि मन्त्रिपरिषदलाई पूर्णता दिने मुख्यमन्त्री कार्कीले बताएका छन् ।