काठमाडौं : गण्डकी प्रदेशका मुख्यमन्त्री खगराज अधिकारीलाई सरकार गठन गर्दा लिखित समर्थन गरेका एकीकृत समाजवादीका सांसद राजीव गुरुङ (दीपक मनाङे)ले विश्वासको मत नदिने बताएका छन् ।

दिपकले सरकार गठनको बेलामा मुख्यमन्त्री अधिकारीलाई समर्थन गरेपनि मन्त्री नपाउने भएपछि विश्वासको मत नदिएर प्रतिपक्षमा बस्ने भन्दै बार्गेनिंग बढाएका छन् ।

‘गण्डकी प्रदेशमा एमालेबाट प्रस्तावित मुख्यमन्त्री माननीय खगराज अधिकारीले लिने विश्वासको मतमा म मनाङ जिल्ला (ख) बाट निर्विरोध निर्वाचित प्रदेशसभा सांसद राजीव गुरुङ प्रतिपक्षमा बस्ने निर्णय गरेको छु’ उनले आफ्नो फेसबुकमा लेखेका छन् ।

एमालेको २२, माओवादीको ८ र राष्ट्रिय प्रजातन्त्र पार्टीको २ मतबाट सरकार बनाउन आवश्यक बहुमतका लागि भने दिपक निर्णायक छ्रैनन् ।

मनाङे मंसिर १९ गते माधव नेपाल नेतृत्वको नेकपा एकीकृत समाजवादी प्रवेश गरेका थिए । निर्वाचनमा एमाले र कांग्रेस दुवैले वाकओभर दिएका कारण उनी निर्विरोध भएका थिए । पुरानो सत्ता गठबन्धनबाट मन्त्री बन्न उनी एकीकृत समाजवादीमा प्रवेश गरेका थिए । तर नयां बाम गठबन्धन बनेपछि केन्द्रमा माधव नेपाल जस्तै गण्डकीमा दिपक अलपत्र परेका छन् ।