काठमाडौं ३ माघ । प्रतिनिधि सभाको सभामुख चयन गर्न संसद सचिवालयले कार्यतालिका सार्वजनिक गरेको छ।
कार्यतालिकाअनुसार बुधबार दिउँसो १ देखि ४ बजेसम्म सभामुखका उम्मेदवारले मनोनयन दर्ता गर्न सक्नेछन्।
सत्ता गठबन्धनमा भएको समझदारी अनुसार एमाले सांसद सभामुख बन्नेछन् । एमालेबाट सभामुखका लागि झापा देवराज घिमिरे कि कास्की कि विद्या भट्टराई भन्ने बहस भइरहेको छ । यस अघि इच्छा राखेका उपमहासचिव पृथ्वी सुव्वा गुरुंग र सचिव छविलाल विश्वकर्मालाई अध्यक्ष ओलीले प्रस्ताव गर्ने सम्भावना सकिएको एक स्थायी समिति सदस्यले बताए । अध्यक्ष ओलीले परराष्ट्रमन्त्री बनाउने चर्चामा रहेकी विद्या भट्टराईले आफू मन्त्री नबन्ने भनेपछि भट्टराई नै सभामुख हुने बताइएको छ ।
एक जनाभन्दा बढीको उम्मेदवारी परेमा सभामुख चयन गर्न बिहीबार मतदान हुने छ।
सत्तारूढ गठबन्धनको भागबन्डामा सभामुख एमालेको भागमा परेको छ। सत्ता गठबन्धनका एकजुट हुँदा गठबन्धनका उम्मेदवारको पक्षमा सजिलै बहुमत पुग्ने देखिन्छ।
एमालेबाट सांसद देवराज घिमिरे सभामुख उम्मेदवार बन्ने प्रबल सम्भावना छ।
सभामुख बन्ने दौडमा एमाले सांसदहरू पृथ्वीसुब्बा गुरूङ, विद्या भट्टराई, छविलाल विश्वकर्मा पनि छन्।
‘तर अध्यक्षज्यूले घिमिरेलाई उम्मेदवार बनाउने सम्भावना बढी छ,’ एक एमाले नेताले भने।
घिमिरे झापा क्षेत्र नं २ बाट निर्वाचित भएका हुन्। एक पटक राष्ट्रिय सभा सदस्य भएका घिमिरे पहिलो पटक प्रतिनिधि सभामा आएका हुन्।
‘लो प्रोफाइल’मा बस्न रुचाउने घिमिरे जनतामा भन्दा कार्यकर्तामाझ धेरै लोकप्रिय छन्।
प्रतिक्रिया दिनुहोस्